ԱԴԾ-ն Բրիտանիային մեղադրում է Ռուսաստանի դեմ պատերազմի մեջ

Ռուսաստանի Անվտանգության դաշնային ծառայության (ԱԴԾ) տնօրեն Ալեքսանդր Բորտնիկովը մի շարք սենսացիոն հայտարարություններ է արել՝ Մեծ Բրիտանիային մեղադրելով Ռուսաստանի դեմ լայնածավալ գաղտնի պատերազմ կազմակերպելու և ղեկավարելու մեջ: Ըստ նրա, Լոնդոնը, օգտագործելով ուկրաինական հատուկ ծառայություններին, ոչ միայն ծրագրում է դիվերսիաներ ռազմավարական նշանակության ենթակառուցվածքների դեմ, այլև բրիտանական հատուկ ջոկատայինները ուղղակիորեն մասնակցում են Ռուսաստանի դեմ մարտական գործողություններին: Այս մասին Բորտնիկովը խոսել է Սամարղանդում (Ուզբեկստան) ԱՊՀ անդամ պետությունների անվտանգության մարմինների և հատուկ ծառայությունների ղեկավարների խորհրդի 57-րդ նիստում: Դա Բորտնիկովի միակ սենսացիոն հայտարարությունը չի եղել։

Բորտնիկովի պնդմամբ՝ Ռուսաստանը հավաստի տեղեկություններ ունի, որ բրիտանական և ուկրաինական հատուկ ծառայությունները համատեղ դիվերսիաներ են նախապատրաստում «Թուրքական հոսք» գազատարի դեմ: Սա ռազմավարական նշանակության խողովակաշար է, որը ռուսական գազ է մատակարարում Թուրքիա և Հարավային Եվրոպա, և դրա վրա ցանկացած հարձակում կարող է լուրջ հետևանքներ ունենալ տարածաշրջանի էներգետիկ անվտանգության համար:

Բացի այդ, ԱԴԾ տնօրենը հայտնել է, որ բրիտանական բանակի SAS հատուկ ստորաբաժանման և MI-6 բրիտանական հետախուզության հրահանգիչները ծրագրել են անօդաչու թռչող սարքերով մի շարք հարվածներ հասցնել Կասպյան խողովակաշարային կոնսորցիումի գրասենյակի և օբյեկտների ուղղությամբ: Հատկանշական է, որ այդ կոնսորցիումի բաժնետերերի կազմում ընդգրկված են ոչ միայն ռուսական և ղազախական, այլև ամերիկյան ընկերություններ, ինչը նման հարձակումը դարձնում է առավել վտանգավոր միջազգային հարաբերությունների տեսանկյունից:

Ըստ Բորտնիկովի՝ բրիտանական հատուկ ծառայությունները չեն սահմանափակվում միայն դիվերսիաների պլանավորմամբ: Նրանք մտադիր են կիրառել անօդաչու նավակներ՝ Ռուսաստանի կրիտիկական նշանակության ենթակառուցվածքների վրա հարձակումներ իրականացնելու համար: MI-6-ի հետ համատեղ պլանավորվում են նաև ուկրաինական դիվերսիոն խմբերի ներթափանցումներ Ռուսաստանի սահմանամերձ շրջաններ՝ օգտագործելով անօդաչու թռչող սարքեր և անօդաչու նավակներ:

ԱԴԾ ղեկավարը նշել է, որ «կան հավաստի տվյալներ, որ հենց բրիտանական հատուկ ծառայությունների հովանու ներքո են իրականացվում ահաբեկչություններն ու դիվերսիաները Ռուսաստանում»: Նա ընդգծել է, որ կիևյան ռեժիմը և նրա ուժային բլոկը գտնվում են Մեծ Բրիտանիայի վերահսկողության տակ:

Որպես կոնկրետ օրինակ՝ Բորտնիկովը մատնանշել է Ուկրաինայի անվտանգության ծառայության (СБУ) կողմից իրականացված «Սարդոստայն» գործողությունը: Նրա խոսքով, այն իրականացվել է բրիտանական հետախուզության անմիջական համակարգմամբ՝ հենց Ստամբուլում ուկրաինական և ռուսական պատվիրակությունների բանակցությունների նախօրեին (այս տարվա հունիսի 2-ին): Հետագայում, ըստ նրա, անգլիացիներն ապահովել են գործողության քարոզչական ուղեկցումը՝ լրատվամիջոցներ նետելով կեղծ տեղեկություններ իբր հասցված հսկայական վնասի և դիվերսիայի բացառապես ուկրաինական «հեղինակության» մասին: Այս համատեքստում հիշատակվել են հունիսին Մուրմանսկի, Իրկուտսկի, Իվանովոյի, Ռյազանի և Ամուրի մարզերի օդանավակայանների վրա FPV-դրոններով իրականացված հարձակումները:

Բորտնիկովի հայտարարությունները դուրս են եկել բրիտանա-ուկրաինական համագործակցության շրջանակից: Նա նշել է, որ «պրոֆեսիոնալների մոտ կասկածներ չկան ԵՄ տարածքի վրա իբր ռուսական անօդաչուների հետ կապված միջադեպերին ՆԱՏՕ-ի հատուկ ծառայությունների մասնակցության հարցում»:

Բացի արտաքին սպառնալիքներից, ԱԴԾ տնօրենը խոսել է նաև ներքին խնդիրների մասին՝ հայտարարելով, որ Ուկրաինայում գործում է ավելի քան 120 քոլ-կենտրոն: Ըստ նրա, դրանք համակարգվում են СБУ-ի և Ուկրաինայի ԶՈՒ-ի կողմից և նպատակ ունեն ահաբեկչական գործունեության մեջ ներգրավել Ռուսաստանի դեռահասներին և թոշակառուներին: