ՌԴ-ն ԱՄՆ-ին փաստաթղթեր է փոխանցել Քենեդու սպանության գործով

ԱՄՆ-ում Ռուսաստանի դեսպան Ալեքսանդր Դարչիևը Հանրապետական կուսակցությունը ներկայացնող կոնգրեսական Աննա Պաուլինա Լունային է փոխանցել «Ռոսարխիվի» նյութերը՝ հիմնված ԱՄՆ նախագահ Ջոն Քենեդու սպանության վերաբերյալ խորհրդային գաղտնազերծված փաստաթղթերի վրա։ Այս մասին «ՌԻԱ Նովոստիին» հայտնել են դիվանագիտական ներկայացուցչությունից։ Փաստաթղթերի փոխանցման արարողությունը տեղի է ունեցել Վաշինգտոնում դեսպանի նստավայրում։ Ընդունելով Լունային՝ Դարչիևը հույս է հայտնել, որ «Քենեդու սպանությունը և խորհրդա-ամերիկյան հարաբերությունները» ժողովածուի խմբագրակազմի կողմից հավաքված արխիվային տվյալները «լրացուցիչ լույս կսփռեն տեղի ունեցած ողբերգության վրա»։

Նշվում է, որ փաստաթղթերը փոխանցվել են կոնգրեսականի խնդրանքով՝ Քենեդու սպանության լրացուցիչ հետաքննության շրջանակներում, որը խոստացել էր անցկացնել ԱՄՆ նախագահ Դոնալդ Թրամփը։ Հաղորդվում է, որ նյութերի մի մասը նախկինում ամերիկյան կողմը ստացել էր ԽՍՀՄ Գերագույն խորհրդի նախագահ Անաստաս Միկոյանից, ով ներկայացնում էր Խորհրդային Միությունը պետության ղեկավարի հուղարկավորությանը։

Կոնգրեսական Լունան, իր հերթին, X սոցիալական ցանցում շնորհակալություն է հայտնել դեսպանությանը նյութերը փոխանցելու համար՝ ընդգծելով, որ «սա ունի հսկայական պատմական նշանակություն»։ Նա նշել է, որ փորձագետներն անհապաղ կսկսեն ուսումնասիրել և թարգմանել փաստաթղթերն իր գրասենյակում, որոնք հետագայում կհրապարակվեն։

Հիշեցնենք, որ ԱՄՆ նախագահ Ջոն Ֆ. Քենեդին սպանվել է Դալասում 1963 թվականի նոյեմբերի 22-ին։ Պաշտոնական հետաքննությունը պարզել է, որ հանցագործությունը կատարել է միայնակ գործող Լի Հարվի Օսվալդը, ում սպանեցին ձերբակալությունից երկու օր անց։ Հետաքրքիր է, որ 1959-1960 թվականներին Օսվալդն ապրել է ԽՍՀՄ-ում, աշխատել Մինսկի գործարանում որպես խառատ և ամուսնացել ռուս աղջկա հետ։ Այս հանգամանքը բազմաթիվ տեսությունների տեղիք է տվել այն մասին, թե ում կարող էր ձեռնտու լինել Քենեդու սպանությունը։

Հարկ է նշել, որ ԱՄՆ իշխանությունները, օրենքի համաձայն, պետք է ամբողջությամբ գաղտնազերծեին Քենեդու սպանության վերաբերյալ տվյալները մինչև 2017 թվականը։ Սակայն և՛ Դոնալդ Թրամփը, և՛ նրա նախորդը՝ Ջո Բայդենը, լրացուցիչ ժամանակ են տրամադրել ամերիկյան հետախուզությանը՝ գնահատելու, թե արդյոք տեղեկատվության հրապարակումը կարող է վնաս հասցնել ԱՄՆ շահերին։