Գազայի օկուպացիան պետք է կասեցվի. ՄԱԿ-ի բարձր հանձնակատար

ՄԱԿ Մարդու իրավունքների բարձր հանձնակատար Վոլկեր Տյուրկը հայտարարել է, որ Իսրայելի կողմից Գազա քաղաքի օկուպացման ծրագիրը պետք է անմիջապես կասեցվի։

«Մինչ օրս եղած բոլոր ապացույցները հաշվի առնելով՝ այս հետագա սրացումը կհանգեցնի ավելի զանգվածային հարկադիր տեղահանման, ավելի շատ սպանությունների, ավելի շատ անտանելի տառապանքների, անիմաստ ավերածությունների և դաժան հանցագործությունների»,- նշել է ՄԱԿ պաշտոնյան և հավելել․

«Այս պատերազմը սրելու փոխարեն Իսրայելի կառավարությունը պետք է իր բոլոր ջանքերը ներդնի Գազայի խաղաղ բնակիչների կյանքը փրկելու համար՝ թույլ տալով մարդասիրական օգնության լիարժեք և անարգել հոսքը։

Պատանդները պետք է անհապաղ և անվերապահորեն ազատ արձակվեն պաղեստինյան զինված խմբավորումների կողմից։ Իսրայելի կողմից կամայականորեն ձերբակալված պաղեստինցիները նույնպես պետք է անհապաղ և անվերապահորեն ազատ արձակվեն»։