Թրամփը Քնեսեթում գովել է Նեթանյահուին

ԱՄՆ նախագահ Դոնալդ Թրամփի այցը Իսրայելի խորհրդարան՝ Քնեսեթ, վերածվեց փոխադարձ գովեստի և ռազմավարական դաշինքի վերահաստատման դրամատիկ դրվագի՝ ուղեկցվելով ինչպես ջերմ գնահատականներով, այնպես էլ փոքր միջադեպով։ Ելույթները հագեցած էին անձնական շնորհակալություններով և ապագային միտված համագործակցության խոստուներով։

Կարդացեք նաև՝

Իսրայելի վարչապետ Բենիամին Նեթանյահուն, ողջունելով ԱՄՆ ղեկավարին, նրա այցը որակեց պատմական։ «Նախագահ Թրամփ, Քնեսեթը ողջունում է ձեզ և ձեր պատվիրակությանը Երուսաղեմում՝ մեր հավերժական մայրաքաղաքում։ Սա ձեր առաջին այցն է Իսրայել այն բանից հետո, երբ Երուսաղեմը ճանաչեցիք մեր մայրաքաղաք և դեսպանությունը տեղափոխեցիք այստեղ»,— նշել է Նեթանյահուն՝ Թրամփին անվանելով «Սպիտակ տանը Իսրայելի ամենամեծ ընկերը»։ Նա ընդգծել է, որ ԱՄՆ ոչ մի նախագահ երբեք ավելին չի արել Իսրայելի համար և հավաստիացրել է. «Միասին, պարոն Նախագահ, մենք կհասնենք այս խաղաղությանը»։

Իր ելույթը Թրամփը սկսել է ջերմ խոսքերով՝ Քնեսեթն անվանելով «հրաշալի վայր» և շնորհակալություն հայտնելով Աստծուն և նահապետներ Աբրահամին, Իսահակին ու Հակոբին։ Նա իր հերթին գովեստի խոսքեր է ուղղել Նեթանյահուին. «Շնորհակալություն, Բիբի, դու հիանալի ես»։ Ապա կատակել է. «Նեթանյահուի հետ հեշտ չէ գործ ունենալ, բայց հենց դա է նրան դարձնում ակնառու»։ Անդրադառնալով Գազայի պատերազմի կարգավորմանը՝ նա խոստովանել է, որ «բոլորը կարծում էին, թե դա անհնար է, որ մենք ժամանակ ենք կորցնում», և այս հարցում առանձնահատուկ շնորհակալություն է հայտնել իր ընկերոջը՝ Սթիվ Ուիթքոֆին։

Սակայն ելույթն անցել է ոչ այնքան հարթ։ Երկու պատգամավոր ընդհատեցին նրա խոսքը՝ բարձրացնելով «ցեղասպանություն» գրությամբ պաստառ։ Նրանց արագորեն հեռացրին դահլիճից, ինչին Թրամփն արձագանքեց հակիրճ դիտարկմամբ. «Նրանք արդյունավետ աշխատանք կատարեցին»։