«Թրամփի երթուղու» հարցում դիրքորոշումը կախված է մանրամասներից․ Կոպիրկին

Հայաստանում Ռուսաստանի Դաշնության արտակարգ և լիազոր դեսպան Սերգեյ Կոպիրկինը պարզաբանել է Հայաստանի հարավային հատվածում այսպես կոչված «Թրամփի երթուղու» բացման վերաբերյալ Մոսկվայի դիրքորոշումը՝ նշելով, որ վերջնական կարծիք կձևավորվի միայն նախագծի իրականացման մանրամասներին ամբողջությամբ ծանոթանալուց հետո։

Հարավային Կովկասում խաղաղության և կայունության ամրապնդումը Ռուսաստանի արտաքին քաղաքականության անփոփոխ գերակայություններից է, հայտարարել է դեսպանը՝ ընդգծելով, որ այդ տրամաբանության շրջանակներում Մոսկվան, բնականաբար, սատարում է Հայաստանի և Ադրբեջանի միջև հարաբերությունների կարգավորմանն ուղղված ցանկացած ջանքի։

Անդրադառնալով անմիջականորեն «Թրամփի երթուղուն»՝ Կոպիրկինը նշել է, որ Ռուսաստանի դիրքորոշումը կհստակեցվի այն բանից հետո, երբ մանրամասն պատկերացում կազմվի, թե կոնկրետ ինչպես է իրականացվելու տվյալ տրանսպորտային նախագիծը։

Դեսպանն առանձնահատուկ ուշադրություն է հրավիրել երկու կարևոր հանգամանքի վրա, որոնք պետք է հաշվի առնվեն տարածաշրջանում տրանսպորտային հաղորդակցությունների ապաշրջափակման աշխատանքներում։ Առաջինը Հայաստանի անդամակցությունն է Եվրասիական տնտեսական միությանը (ԵԱՏՄ)։ Սա ենթադրում է, որ ցանկացած նոր տրանսպորտային միջանցք պետք է համապատասխանի ԵԱՏՄ մաքսային և իրավական կարգավորումներին։

Երկրորդ կարևոր գործոնը, ըստ դեսպանի, հայ-իրանական սահմանին երկկողմ փաստաթղթերի վրա հիմնված ռուս սահմանապահների ներկայությունն է։ Այս հանգամանքը նույնպես պահանջում է հաշվառում և համակարգում՝ երթուղու անվտանգության և գործառնական ռեժիմները մշակելիս։

Չնայած առկա անորոշություններին՝ Սերգեյ Կոպիրկինն ընդգծել է, որ ռուսական կողմը բաց է այս թեմաների շուրջ խորհրդակցությունների համար։ Նա հավելել է, որ Մոսկվան պատրաստ է քննարկումներ անցկացնել ինչպես հայ գործընկերների, այնպես էլ մյուս շահագրգիռ կողմերի, այդ թվում՝ Թեհրանի հետ։ Այս հայտարարությունը վկայում է, որ Ռուսաստանը ձգտում է ներգրավված լինել տարածաշրջանային տրանսպորտային նախագծերի քննարկման գործընթացում՝ ապահովելով իր ռազմավարական և տնտեսական շահերի պաշտպանությունը։