Պատերազմի մեկ օրն Ուկրաինայի համար արժե 172 մլն դոլար

Պատերազմի մեկ օրվա համար Ուկրաինան վճարում է 172 միլիոն դոլար: Այս մասին հայտնում է N-tv-ն՝ հղում անելով Ուկրաինայի խորհրդարանի բյուջետային հանձնաժողովի տվյալներին:

Վիճակագրության համաձայն՝ պատերազմի ծախսերը անշեղորեն աճում են: Անցյալ տարի պատերազմի մեկ օրը Կիևին արժեցել է մոտ 140 միլիոն դոլար:

Սա ներառում է զինվորների աշխատավարձերը, զենքը և վիրավորներին կամ մարտի դաշտում զոհվածներին տրվող վճարումները: Այդ թվում դեռ ներառված չեն պատերազմի յուրաքանչյուր օրվա ընթացքում ավերվող շինությունները, քայքայվող տնտեսությունը:

Ըստ Ռադայի բյուջետային հանձնաժողովի տվյալների՝ Ուկրաինայի պաշտպանության ծախսերն արդեն գերազանցում են ՀՆԱ-ի 31%-ը:

Եթե Ռուսաստանի հետ պատերազմը շարունակվի չորրորդ տարին, Ուկրաինային 2026 թվականին պաշտպանության համար կպահանջվի առնվազն 120 միլիարդ դոլար, հայտարարել է երկրի պաշտպանության նախարար Դենիս Շմիգալը: