Փաշինյանն արցախցիներին «հպարտ քաղաքացի» դառնալու կոչ է արել

Ղարաբաղի ժողովուրդը փախստականի իրենց կարգավիճակը պետք է փոխարինեն ՀՀ հպարտ քաղաքացիությամբ, ասել է Նիկոլ Փաշինյանը՝ ՔՊ կուսակցության 7-րդ համագումարում։ «Այսօր, Հայաստանի ժողովուրդ ասելով, հավասարապես նկատի ունեմ մեր Ղարաբաղի մեր ժողովրդին, ովքեր, ի հեճուկս բոլոր փորձերի, ի հեճուկս աննկարագրելի ողբերգության չներքաշվեցին հակահայաստանյան, հակապետական օրակարգերի մեջ»,-ասել է Փաշինյանը։

Ավելի վաղ նա անդրադարձել էր իր՝ «Արցախը Հայաստան է և վերջ» հայտարարությանը։ Այդ հայտարարությունն արել եմ մի պարզ պատճառով, հայրենասիրության պատճառով, որովհետև հայրենասեր եմ եղել, ասել է Նիկոլ Փաշինյանը։

«Հարց է ծագում՝ ինչ է հիմա հայրենասե՞ր չեմ, իհարկե հայրենասեր եմ, բայց ավելի՞, թե՞ պակաս հայրենասեր եմ: Ոչ ավելի, ոչ պակաս, նույնքան հայրենասեր եմ, իսկ 2019 թվականին հայրենասեր եմ եղել այդ պահին Հայաստանում առկա հայրենասիրության միակ մոդելով»։