Լուվրի կողոպուտի գործով ձերբակալվել է 2 կասկածյալ

Ֆրանսիայի ոստիկանությունը զգալի առաջընթաց է գրանցել Փարիզի Լուվր թանգարանից Ֆրանսիայի թագավորական գանձերի տպավորիչ գողության գործով՝ ձերբակալելով երկու առանցքային կասկածյալների։ Այս ձերբակալությունները տեղի են ունեցել հոկտեմբերի 19-ին տեղի ունեցած հանդուգն կողոպուտից մեկ շաբաթ անց, որի ընթացքում չորս հոգուց բաղկացած խումբը րոպեների ընթացքում թանգարանից հափշտակել էր միլիոնավոր եվրոներ արժողությամբ ութ պատմական զարդ։

Ձերբակալությունները տեղի են ունեցել շաբաթ երեկոյան՝ հոկտեմբերի 25-ին։ Կասկածյալներից մեկը բերման է ենթարկվել Փարիզի Շառլ դը Գոլի օդանավակայանում, երբ փորձում էր լքել երկիրը՝ Ալժիր մեկնող չվերթով։ Երկրորդ կասկածյալը ձերբակալվել է դրանից կարճ ժամանակ անց՝ Սեն-Սեն-Դենիում։ Երկու ձերբակալվածներն էլ, որոնք մոտ 30 տարեկան են, արդեն հայտնի են եղել ոստիկանությանը նախկինում կատարած գողությունների համար։ Նրանք կալանավորվել են «կազմակերպված խմբի կողմից գողություն կատարելու» և «հանցավոր համագործակցության» մեղադրանքներով։

Հիշեցնենք, որ հոկտեմբերի 19-ի առավոտյան ժամը 9:30-ի սահմաններում չորս հոգուց բաղկացած խումբը, օգտագործելով վերամբարձ կռունկով բեռնատար, բարձրացել էր մինչև Լուվրի Ապոլլոնի պատկերասրահի պատշգամբը։ Կոտրելով պատուհանը՝ նրանցից երկուսը ներխուժել էին թանգարան, կոտրել ցուցափեղկերը և հափշտակել Ֆրանսիայի թագի ութ արժեքավոր զարդեր՝ մոտ 88 միլիոն եվրո արժեքով։

Հետաքննությունը, որին մասնակցում է հարյուրից ավելի քննիչ, շարունակվում է։ Իրավապահները հույս ունեն, որ ձերբակալությունները կօգնեն ոչ միայն բացահայտել հանցախմբի մյուս անդամներին, այլև գտնել անգին գանձերը, որոնք մինչ այս պահը չեն հայտնաբերվել։