Հայաստանը հավասարակշռված քաղաքականություն է վարում. Արարատ Միրզոյան

Հայաստանը վաղուց հռչակել և հաջողությամբ իրականացնում է բալանսավորված արտաքին քաղաքականություն՝ հավասարակշռություն պահպանելով աշխարհաքաղաքական տարբեր կենտրոնների հետ հարաբերություններում, նույնիսկ դրանց միջև առկա բախումների պայմաններում։ Այս մասին «Օրբելի-2025» ֆորումի պանելային քննարկման ժամանակ հայտարարեց ՀՀ արտգործնախարար Արարատ Միրզոյանը։

Նա մանրամասնեց, որ Հայաստանը զարգացնում է ռազմավարական գործընկերությունը ԱՄՆ-ի և Միացյալ Թագավորության հետ, էականորեն խորացնում է հարաբերությունները Եվրոպական Միության հետ՝ հաշվի առնելով նաև հայ հասարակության՝ ԵՄ անդամակցության ձգտումները։

Միևնույն ժամանակ, Հայաստանը կարևորում է գործընկերությունը Ռուսաստանի Դաշնության հետ և պահպանում է հիանալի հարաբերություններ անմիջական հարևաններ Իրանի և Վրաստանի հետ։ Զուգահեռաբար, ինտենսիվ երկխոսություն է ընթանում Թուրքիայի հետ հարաբերությունների կարգավորման ուղղությամբ, իսկ վերջերս ռազմավարական գործընկերություն է հաստատվել նաև Չինաստանի հետ։

Միրզոյանն առանձնահատուկ անդրադարձավ տարածաշրջանային հարաբերությունների կարգավորմանը, մասնավորապես՝ ենթակառուցվածքների ապաշրջափակման թեմային։ Նա նշեց, որ նախկինում շրջանառվում էին վարկածներ, թե երրորդ երկրներ պետք է ներկայություն ունենան, օրինակ, Հայաստանի և Ադրբեջանի միջև վերագործարկվող երկաթուղու երկայնքով, ինչը Հայաստանի համար անընդունելի է եղել։

Նա ընդգծեց, որ այդ մտահոգություններն այլևս տեղին չեն, քանի որ կողմերը պայմանավորվել են հստակ սկզբունքների շուրջ, որոնք ամրագրված են միջազգային հանրության կողմից ընդունված փաստաթղթերում։

«Այդ սկզբունքներն են տարածքային ամբողջականությունը, սահմանների անձեռնմխելիությունը, ինքնիշխանությունը երկրների և երկրների իրավազորությունը ենթակառուցվածքների նկատմամբ, և, իհարկե, փոխադարձությունը»,- հայտարարեց նախարարը։ Նրա խոսքով, այս սկզբունքների ամրագրմամբ երրորդ երկրների կողմից վերահսկողության թեման «սպառվում է»։

Ամփոփելով խոսքը՝ Արարատ Միրզոյանը վստահություն հայտնեց, որ Հայաստանի կողմից վարվող հավասարակշռված քաղաքականությունը շահավետ է ոչ միայն երկրի, այլև ողջ տարածաշրջանի համար։