G7-ը 50 մլրդ դոլար կհատկացնի Ուկրաինային

ՄԱԿ-ի Գլխավոր ասամբլեայի Բարձր մակարդակի շաբաթվա շրջանակներում Նյու Յորքում կայացած հանդիպմանը «Մեծ յոթնյակի» երկրների՝ Կանադայի, Ֆրանսիայի, Գերմանիայի, Իտալիայի, Ճապոնիայի, Միացյալ Թագավորության, ԱՄՆ-ի արտգործնախարարները և Եվրամիության բարձր ներկայացուցիչը հանդես են եկել հայտարարությամբ։ Ասելիքի առանցքային մասը նվիրված էր Ուկրաինային։

G7-ի անդամները վերահաստատել են իրենց անսասան աջակցությունն Ուկրաինային՝ ընդդեմ Ռուսաստանի «դաժան և չարդարացված ագրեսիվ պատերազմի»։ Այս համատեքստում նրանք հաստատել են Կիևին մինչև տարեվերջ շուրջ 50 միլիարդ ԱՄՆ դոլարի լրացուցիչ ֆինանսավորում տրամադրելու պլանը՝ Եվրամիությունում և այլ իրավասություններում ռուսական սուվերեն ակտիվների սառեցումից ստացվող արտասովոր եկամուտների հաշվին։ Ընդգծվել է, որ Ռուսաստանի ակտիվները կմնան սառեցված, մինչև Մոսկվան չդադարեցնի ագրեսիան և չփոխհատուցի վնասները։

G7-ը նաև պարտավորվել է խստացնել Ռուսաստանի դեմ գործող պատժամիջոցները և տնտեսական միջոցները, այդ թվում՝ նավթի գնի սահմանաչափի քաղաքականությունը։ Հատուկ ուշադրություն է դարձվել Չինաստանում և երրորդ երկրներում գործող այն սուբյեկտների դեմ միջոցներ ձեռնարկելու մտադրությանը, որոնք էականորեն աջակցում են Ռուսաստանի ռազմական մեքենային՝ մատակարարելով երկակի նշանակության նյութեր։

G7-ի նախարարները դատապարտել են 2023 թվականի հոկտեմբերի 7-ի ՀԱՄԱՍ-ի հարձակումները և խորը մտահոգություն հայտնել Մերձավոր Արևելքում բռնության աճի կապակցությամբ։ Նրանք վերահաստատել են իրենց լիակատար աջակցությունը ՄԱԿ-ի Անվտանգության խորհրդի 2735 բանաձևի իրականացմանը և նախագահ Բայդենի կողմից ներկայացված համապարփակ գործարքին, որը նախատեսում է անհապաղ հրադադար Գազայում, բոլոր պատանդների ազատ արձակում, մարդասիրական օգնության հոսքի զգալի ավելացում և ճգնաժամի կայուն ավարտ՝ «երկու պետություն» սկզբունքով լուծման ճանապարհին։

Հայտարարության մեջ նաև կոչ է արվում Իրանին՝ դադարեցնել ապակայունացնող գործողությունները տարածաշրջանում և հրաժարվել միջուկային զենք մշակելու կամ ձեռք բերելու մտադրությունից։ Խստորեն դատապարտվել է Իրանի կողմից Ռուսաստանին բալիստիկ հրթիռների և անօդաչու թռչող սարքերի մատակարարումը, որոնք օգտագործվում են Ուկրաինայի դեմ։

G7-ի անդամները վերահաստատել են իրենց հանձնառությունը ազատ և բաց հնդկախաղաղօվկիանոսյան տարածաշրջանին՝ հիմնված իրավունքի գերակայության վրա։ Չինաստանի հետ կառուցողական և կայուն հարաբերություններ փնտրելով՝ նրանք միևնույն ժամանակ խորը մտահոգություն են հայտնել Պեկինի կողմից Ռուսաստանի պաշտպանական արդյունաբերական բազային ցուցաբերվող աջակցության կապակցությամբ։ G7-ը Չինաստանին կոչ է արել դադարեցնել երկակի նշանակության նյութերի փոխանցումը Ռուսաստանին։