Մակրոնը վճռորոշ հայտարարությամբ հանդես կգա․Le Figaro

Ֆրանսիան հայտնվել է քաղաքական խորը անորոշության մեջ, իսկ ամբողջ երկիրը, շունչը պահած, սպասում է նախագահ Էմանուել Մակրոնի առաջիկա ելույթին, որը նախատեսված է չորեքշաբթի երեկոյան։ Այս հայտարարությունը կարող է ճակատագրական լինել ֆրանսիական քաղաքական դաշտի համար՝ պարունակելով երկու հնարավոր սցենար՝ կամ փխրուն փոխզիջում, կամ արմատական քայլ՝ խորհրդարանի ցրում։ Այս լարված իրավիճակի մասին, հղում անելով սեփական աղբյուրներին, գրում է ֆրանսիական հեղինակավոր Le Figaro պարբերականը՝ նկարագրելով այն փակուղին, որում հայտնվել է նախագահը։

Ամեն ինչի հիմքում վարչապետ Սեբաստիեն Լըկորնյուի հրաժարականի դիմումն է, որը դարձավ կառավարության նորացված կազմի հայտարարությանը հաջորդած ընդդիմության սուր քննադատության տրամաբանական շարունակությունը։ Ընդդիմադիր ուժերին զայրացրել էր այն փաստը, որ նոր կաբինետի 18 նախարարական պորտֆելներից 13-ը բաժին էին հասել նախորդ կառավարության ներկայացուցիչներին։ Ի պատասխան ստեղծված ճգնաժամի՝ Մակրոնը 48-ժամյա ժամկետ էր տվել Լըկորնյուին՝ քաղաքական բոլոր կուսակցությունների հետ խորհրդակցություններ անցկացնելու և ճգնաժամից դուրս գալու ճանապարհ գտնելու համար։ Նախագահի չորեքշաբթի երեկոյան նախատեսված ելույթը տեղի կունենա հենց այս վերջնաժամկետի լրանալուց հետո, ինչն էլ ստեղծել է լարված սպասումների մթնոլորտ։

Le Figaro-ն չի բացառում, որ Մակրոնը կարող է դիմել ամենաարմատական քայլին՝ Ազգային ժողովի (խորհրդարանի ստորին պալատի) արձակմանը։ Այս վարկածի օգտին է խոսում այն փաստը, որ նախագահը երեքշաբթի օրը հանդիպումներ է ունեցել Սենատի խոսնակ Ժերար Լարշեի և Ազգային ժողովի նախագահ Յաել Բրոն-Պիվեի հետ։ Նման խորհրդակցությունները Ֆրանսիայի Սահմանադրության 12-րդ հոդվածով նախատեսված պարտադիր ընթացակարգ են, որոնք նախորդում են ստորին պալատը ցրելու մասին որոշմանը։

Այս հանգամանքը ստիպում է շատ վերլուծաբանների կարծել, որ նախագահը լրջորեն դիտարկում է արտահերթ խորհրդարանական ընտրություններ նշանակելու հնարավորությունը՝ փորձելով վերագտնել կորցրած քաղաքական հենարանը։

Միևնույն ժամանակ, պարբերականի մեկ այլ աղբյուր պնդում է, որ իրավիճակը կարող է այնքան էլ դրամատիկ չլինել։ Ըստ այդ աղբյուրի՝ ընթացող քննարկումները նպատակ ունեն «հավասարակշռության կետեր գտնել» և կառուցել քաղաքական նոր հենք։ Երկուշաբթի երեկոյան Ելիսեյան պալատը հայտնել էր, որ Մակրոնը հանձնարարել է Լըկորնյուին բանակցությունների միջոցով «որոշել գործողությունների հարթակ՝ հանուն երկրի կայունության»։

Բանակցությունների ձախողման դեպքում, ըստ նախագահի շրջապատի, Մակրոնը խոստացել է «իր վրա վերցնել պատասխանատվությունը» հետագա որոշումների համար։ Թե կոնկրետ ինչ է թաքնված այս խորհրդավոր ձևակերպման հետևում, Ելիսեյան պալատից չեն պարզաբանել՝ Ֆրանսիային թողնելով անորոշության, ֆրանսիացիներին՝ կանխատեսումների մեջ՝ մինչև նախագահի վճռորոշ ելույթը։