Զելենսկին պատրաստ է տարածքային հարցը քննարկել, բայց միայն Պուտինի հետ

Ուկրաինայի նախագահ Վոլոդիմիր Զելենսկին պատրաստ է քննարկել տարածքային հարցը, հայտարարել է Ուկրաինայի արտաքին գործերի փոխնախարար Սերգեյ Կիսլիցան NBC News-ին տված հարցազրույցում։

Միևնույն ժամանակ, Կիսլիցան նշել է, որ Զելենսկին տարածքային հարցում առաջնորդվում է «ինչպես Ուկրաինայի գործող օրենսդրությամբ, այնպես էլ հանրային կարծիքով»։

Նա ընդգծել է, որ ուկրաինական հասարակությունը «կտրականապես դեմ է մեր տարածքը խաղաղության հետ փոխանակելուն»։

Ամերիկյան ԶԼՄ-ների տվյալներով՝ Պուտինը ԱՄՆ նախագահ Դոնալդ Թրամփի հետ Ալյասկայում կայացած հանդիպման ժամանակ հայտարարել է, որ Ուկրաինան պետք է ՌԴ-ին հանձնի ամբողջ Դոնբասը, ներառյալ Կիևի վերահսկողության տակ գտնվող տարածքները։

Ուկրաինայի նախագահն էլ նախկինում բազմիցս հայտարարել է, որ երկրի որևէ մասից հրաժարվելն անհնար է։ Օգոստոսի 23-ին՝ Պետական դրոշի օրվա տոնակատարությունների ժամանակ ելույթ ունենալով, Զելենսկին կրկին ասել է. «Մենք մեր հողը չենք նվիրի օկուպանտին»։