Զելենսկին Փարիզում է. օրակարգում Rafale կործանիչներն են

Ուկրաինայի նախագահ Վլադիմիր Զելենսկին պաշտոնական այցով ժամանել է Ֆրանսիա։ Փարիզի օդանավակայանում նրան անձամբ դիմավորել է Ֆրանսիայի նախագահ Էմանուել Մակրոնը։ Այցի առանցքում ռազմական համագործակցությանն առնչվող հարցերն են, և սպասվում է, որ կողմերը կկնքեն մի շարք կարևոր պայմանագրեր։

Ըստ Reuters գործակալության տեղեկությունների՝ Զելենսկու և Մակրոնի հանդիպումը կարող է ավարտվել ավիացիայի ոլորտում 10-ամյա ռազմավարական համաձայնագրի ստորագրմամբ։ Այս պայմանագիրը կարող է ներառել ֆրանսիական Dassault ընկերության արտադրության Rafale բազմաֆունկցիոնալ մարտական ինքնաթիռների մատակարարում Կիևին։

Աղբյուրները նշում են, որ այս քայլը Ուկրաինայի՝ 250 մարտական ինքնաթիռից բաղկացած ավիապարկ ստեղծելու երկարաժամկետ ծրագրի մի մասն է։

Բացի կործանիչներից, նախատեսվում է նաև կնքել համաձայնագրեր լրացուցիչ SAMP/T հակաօդային պաշտպանության համակարգերի, հրթիռների, ինչպես նաև անօդաչու թռչող սարքերի (ԱԹՍ) դեմ պայքարի համակարգերի մատակարարման վերաբերյալ։ Այս այցը և սպասվող պայմանագրերը կարող են էականորեն ամրապնդել Ուկրաինայի պաշտպանական կարողությունները՝ հատկապես օդային տարածքի վերահսկողության հարցում։