Զապորոժիեի ԱԷԿ-ի էլեկտրամատակարարման վերականգնումը կտևի մեկ շաբաթ

Զապորոժիեի ատոմային էլեկտրակայանի արտաքին էլեկտրամատակարարման վերականգնմանն ուղղված վերանորոգման աշխատանքները կտևեն մոտավորապես մեկ շաբաթ։ Այս մասին, հղում անելով Ատոմային էներգիայի միջազգային գործակալությանը (ՄԱԳԱՏԷ), հայտնում է ֆրանսիական Le Monde պարբերականը։

Գործակալության տվյալներով՝ մասնագետներն արդեն սկսել են վերանորոգման աշխատանքները՝ տարածքի ականազերծումից հետո։ Ներկայումս վերականգնվում են մայիսի 7-ին շարքից դուրս եկած էլեկտրահաղորդման գծի երկու մալուխները։ Առաջիկա հանգստյան օրերի ավարտին նախատեսվում է սկսել նաև այն հատվածի վերանորոգումը, որը վնասվել էր սեպտեմբերի 23-ին։ Հենց այդ վթարն էր հանգեցրել կայանի էլեկտրաէներգիայի լիակատար անջատմանը, ինչը լրջագույն ռիսկեր է ստեղծում միջուկային անվտանգության համար։

ՄԱԳԱՏԷ-ում հստակեցրել են, որ վերանորոգման աշխատանքներն իրականացվում են ԶԱԷԿ-ի հարթակի շուրջը գտնվող օբյեկտներում, որտեղ հրետակոծությունների հետևանքով վնասվել են արտաքին էլեկտրահաղորդման գծերը։ Կայանի անվտանգ շահագործման համար կենսականորեն կարևոր է արտաքին սնուցման կայուն աղբյուրների առկայությունը, որոնք ապահովում են ռեակտորների սառեցման համակարգերի անխափան աշխատանքը։