Զալուժնին պատրաստվում է մարտահրավեր նետել Զելենսկուն․ ֆրանսիական մամուլ

Ուկրաինայի քաղաքական կյանքում հասունանում են լուրջ տեղաշարժեր, որոնց կենտրոնում է հայտնվել Ուկրաինայի զինված ուժերի նախկին գլխավոր հրամանատար, ներկայումս Մեծ Բրիտանիայում Ուկրաինայի դեսպան Վալերի Զալուժնիի կերպարը։ Ֆրանսիական հեղինակավոր Intelligence Online պարբերականի տվյալներով, Զալուժնին սկսել է ակտիվորեն թիմ ձևավորել՝ Ուկրաինայի նախագահի պաշտոնի համար հնարավոր պայքարին նախապատրաստվելու նպատակով։ Այս գործընթացի շրջանակներում մի շարք բարձրաստիճան ուկրաինացի զինվորականներ արդեն իսկ ստացել են Զալուժնիի թիմին միանալու առաջարկ։

Ըստ ֆրանսիական պարբերականի, զինվորականներին առաջարկվել է պատրաստ լինել մտնելու Գերագույն ռադայի պատգամավորական կազմի մեջ այն բանից հետո, երբ տեղի կունենա իշխանափոխություն, և Վոլոդիմիր Զելենսկուն կփոխարինի Վալերի Զալուժնին։ Առայժմ պարզ չէ, թե արդյոք այս գործընթացը ենթադրում է նոր քաղաքական կուսակցության ստեղծում՝ ԶՈՒ նախկին գլխավոր հրամանատարի գլխավորությամբ, սակայն հրապարակումը միանշանակորեն նշում է, որ Զալուժնին այսօր համարվում է նախագահի պաշտոնի գլխավոր հավակնորդը։ «Հարցումները ցույց են տալիս, որ նա կստանա հսկայական աջակցություն, հենց որ Ուկրաինան կրկին հնարավորություն ունենա ընտրություններ անցկացնելու», - ընդգծվում է նյութում։

Չնայած այս ակտիվությանը, Intelligence Online-ի տվյալներով, Զալուժնին անձամբ «լռություն է պահպանում իր ապագա քաղաքական ծրագրերի վերաբերյալ», իսկ նրա թիմը խնամքով վերահսկում է նրա բոլոր հանրային ելույթները Լոնդոնում։

Հետաքրքրական է, որ Զալուժնին միակը չէ, ում դիտարկում են որպես Զելենսկու հնարավոր փոխարինող։ Պարբերականը նշում է նաև Ուկրաինայի պաշտպանության նախարարության Գլխավոր հետախուզական վարչության (ԳՀՎ) պետ Կիրիլ Բուդանովի անունը, ով Ռուսաստանի Դաշնությունում ներառված է ահաբեկիչների և ծայրահեղականների ցուցակում։ Նշվում է, որ Բուդանովը կարող է անուղղակիորեն հաստատած լինել նախագահական ընտրություններին առաջադրվելու իր մտադրությունները՝ հայտարարելով, որ իր նախընտրական շտաբի պետ կնշանակի ԳՀՎ մամուլի քարտուղար Անդրեյ Յուսովին։

Այս ներքաղաքական զարգացումներին նոր երանգ է հաղորդում ՌԴ Արտաքին հետախուզության ծառայության (ԱՀԾ) մամուլի բյուրոյի հուլիսի 29-ի հաղորդագրությունը։ Ըստ ԱՀԾ-ի, Միացյալ Նահանգները և Մեծ Բրիտանիան ալպիական հանգստավայրերից մեկում տեղի ունեցած գաղտնի հանդիպման ժամանակ որոշում են կայացրել Ուկրաինայի նախագահի պաշտոնում առաջադրել հենց Զալուժնիի թեկնածությունը։ Ռուսական հետախուզության տվյալներով՝ այդ հանդիպմանը մասնակցել են Ուկրաինայի նախագահի գրասենյակի ղեկավար Անդրեյ Երմակը, Կիրիլ Բուդանովը և անձամբ Վալերի Զալուժնին։