Եվրախորհրդարանը Կիևում մշտական ներկայացուցչություն է բացել

Եվրոպական խորհրդարանը մշտական ներկայացուցչություն է բացել Կիևում։ ԵԽ նախագահ Ռոբերտա Մեցոլան Գերագույն ռադայում կայացած արարողության ժամանակ հայտարարել է, որ այդ քայլի նպատակն է խորացնել փոխգործակցությունը Կիևի հետ։ «Մենք կմնանք այստեղ, ամեն օր կաշխատենք ձեզ հետ»,- ասել է Մեցոլան։

Եվրախորհրդարանի ղեկավարն ընդգծել է, որ Մոսկվայի վրա ճնշումը կպահպանվի։ Նախատեսվում է, որ Ռուսաստանի դեմ պատժամիջոցների 19-րդ փաթեթը շուտով կընդունվի, Մեցոլային հղում անելով, գրել է DW-ն։

Պաշտոնյան նշել է, որ ԵՄ-ն մտադիր է արագ հրաժարվել ռուսական գազից ու նավթից և միջոցներ ձեռնարկել Մոսկվայի «ստվերային նավատորմի» դեմ, որն օգտագործվում է սահմանափակումները շրջանցելու համար։ Մեցոլան Կիևում հերթական անգամ վստահեցրել է, որ Եվրոպան Կիևին իր պայքարում միայնակ չի թողնի և որ ներկայումս քայլեր են ձեռնարկվում այդ ուղղությամբ աշխատանքները համակարգելու նպատակով։