ԵՄ-ն հեշտացնում է առանց վիզայի ռեժիմի կասեցումը. օրենքը կազդի նաև Վրաստանի վրա

Եվրախորհրդարանը հաստատել է օրենսդրական փոփոխություն, որը զգալիորեն հեշտացնում է Եվրամիության հետ առանց վիզայի ռեժիմ ունեցող երկրների համար դրա գործողության կասեցման մեխանիզմը։ Նոր կանոնակարգը թույլ կտա ԵՄ-ին ավելի արագ և արդյունավետ արձագանքել այն դեպքերին, երբ որևէ երկիր սկսում է անվտանգության ռիսկեր ներկայացնել կամ թույլ է տալիս մարդու իրավունքների խախտումներ։

Հոկտեմբերի 6-ին կայացած քվեարկության ընթացքում Եվրախորհրդարանի պատգամավորները հավանություն են տվել ԵՄ վիզաների կասեցման մեխանիզմի բարեփոխմանը։ Օրենքը վերաբերում է ընդհանուր առմամբ 61 երկրի, որոնց թվում է նաև Վրաստանը։ Ներկայումս Վրաստանի քաղաքացիները կարող են առանց վիզայի մուտք գործել Շենգենյան գոտի՝ կարճաժամկետ այցով, մինչև 90 օր՝ ցանկացած 180-օրյա ժամանակահատվածում։ Նոր օրենքը այս արտոնության նկատմամբ սահմանում է ավելի խիստ վերահսկողության պայմաններ։

Օրենսդրական նախաձեռնությունն ընդունվել է ձայների զգալի մեծամասնությամբ. կողմ է քվեարկել 518 պատգամավոր, դեմ՝ 96, իսկ 24-ը ձեռնպահ են մնացել։ Սա վկայում է Եվրախորհրդարանում առկա լայն քաղաքական կոնսենսուսի մասին՝ ԵՄ սահմանների անվտանգության և արժեքային քաղաքականության պաշտպանության հարցում։

Օրենքի ուժի մեջ մտնելու համար մնացել են մի քանի ընթացակարգային քայլեր։ Հաջորդ փուլում այն պետք է հաստատվի ԵՄ Խորհրդի կողմից, ինչը նախատեսվում է իրականացնել նոյեմբերին։ Խորհրդի կողմից հաստատվելուց հետո օրենքը կհրապարակվի ԵՄ պաշտոնական տեղեկագրում և ուժի մեջ կմտնի հրապարակումից 20 օր անց։