Սպասվում է տաք և արևառատ տասնօրյակ. Գագիկ Սուրենյան

Առաջիկա 10 օրերին Հայաստանում սպասվում է առանց տեղումների և տաք եղանակ։ Այս մասին ֆեյսբուքյան իր էջում հրապարակված տեսանյութում հայտնել է «Հիդրոօդերևութաբանության և մոնիթորինգի կենտրոն»-ի տնօրենի տեղակալ Գագիկ Սուրենյանը։

Նրա խոսքով՝ վերջին երկու օրերին հանրապետության տարածքը գտնվել է Միջերկրական ծովից ներթափանցած ցիկլոնի ազդեցության տակ, ինչի հետևանքով առանձին շրջաններում կարճատև անձրևներ են տեղացել։ Սակայն, ինչպես նշել է Սուրենյանը, առաջիկա ժամերից այդ ցիկլոնն ամբողջությամբ դուրս կգա Հայաստանի տարածքից։

«Այն իր տեղը կրկին զիջում է հարավ–արևմուտքից ներթափանցող տաք օդային հոսանքներին, որոնք մինչև ամսվա վերջին օրեր կմնան Հայաստանի տարածքում։ Այսպիսով, առաջիկա ժամերից սկսած տեղումները երկրի ամբողջ տարածքում կդադարեն», - հայտնել է Սուրենյանը։

Ըստ կանխատեսման՝ օդի ջերմաստիճանը նոյեմբերի 18-19-ն ընկած ժամանակահատվածում ցերեկային ժամերին կբարձրանա 3-4 աստիճանով և կպահպանվի անփոփոխ։

Գագիկ Սուրենյանը նաև հավելել է, որ նոյեմբերի երրորդ տասնօրյակը ևս կլինի «բավականին տաք և սակավատեղում»։