ՇՀԿ-ն նպաստում է միջազգային հարաբերությունների նոր տեսակին. Սի Ծինփին

Շանհայի համագործակցության կազմակերպությունը (ՇՀԿ) դարձել է կարևոր ուժ, որը նպաստում է միջազգային հարաբերությունների նոր տեսակի կառուցմանը, օգոստոսի 31-ին, ՇՀԿ-ի գագաթնաժողովի բարձրաստիճան հյուրերի ընդունելության ժամանակ, հայտարարել է Չինաստանի ղեկավար Սի Ծինփինը։

«Հիմնադրումից ի վեր Շանհայի համագործակցության կազմակերպությունը հետևողականորեն պահպանել է «Շանհայի ոգին», ամրապնդել է միասնությունն ու փոխադարձ վստահությունը, խորացրել է գործնական համագործակցությունը և մասնակցել է միջազգային և տարածաշրջանային գործերին», - ասել է Սի Ծինփինը։

Չինաստանի ղեկավարն ընդգծել է, որ ՇՀԿ-ն «դարձել է նշանակալի ուժ, որը նպաստում է միջազգային հարաբերությունների նոր տեսակի կառուցմանը և մարդկության ընդհանուր ճակատագրի համայնքի ձևավորմանը»։ Նա նաև վստահություն է հայտնել, որ Տյանցզինում կայանալիք միության գագաթնաժողովը նոր խթան կհաղորդի Շանհայի համագործակցության կազմակերպության կայուն զարգացմանը։

Հիշեցնենք, որ կազմակերպության պատմության մեջ ամենամեծ գագաթնաժողովը տեղի է ունենում Չինաստանի Տյանցզին քաղաքում օգոստոսի 31-ից սեպտեմբերի 1-ը, որին մասնակցում են ավելի քան 20 օտարերկրյա պետությունների ղեկավարներ, ինչպես նաև միջազգային կազմակերպությունների ներկայացուցիչներ։

Շանհայի համագործակցության կազմակերպությունը միջազգային կազմակերպություն է, որը հիմնադրվել է 2001 թվականին։ Դրա կազմում են Հնդկաստանը, Իրանը, Ղազախստանը, Չինաստանը, Ղրղզստանը, Ռուսաստանը, Տաջիկստանը, Պակիստանը և Ուզբեկստանը, իսկ 2024 թվականի հուլիսի 4-ին Աստանայում կայացած գագաթնաժողովում կազմակերպությանը պաշտոնապես միացել է Բելառուսը։

Դիտորդ երկրներն են Աֆղանստանը և Մոնղոլիան, երկխոսության գործընկեր պետությունները՝ Հայաստանը, Ադրբեջանը, Բահրեյնը, Եգիպտոսը, Կամբոջան, Կատարը, Քուվեյթը, Մալդիվները, Մյանման, Նեպալը, Արաբական Միացյալ Էմիրությունները, Սաուդյան Արաբիան, Թուրքիան, Շրի Լանկան։