Վիշապն ու փիղը պետք է միավորվեն․ Չինաստանի նախագահը՝ Հնդկաստանի վարչապետին

Չինաստանի նախագահ Սի Ծինփինը հանդիպել է Հնդկաստանի վարչապետ Նարենդրա Մոդիի հետ: Սա Մոդիի առաջին այցն է Չինաստան վերջին յոթ տարվա ընթացքում, որը տեղի է ունենում երկու երկրների և ԱՄՆ-ի միջև հարաբերությունների վատթարացման ֆոնին:

«Աշխարհը շարժվում է դեպի փոխակերպում: Չինաստանը և Հնդկաստանը երկու ամենաքաղաքակիրթ երկրներն են: Մենք աշխարհի երկու ամենախիտ բնակեցված երկրներն ենք և Գլոբալ Հարավի մաս: Կենսականորեն կարևոր է լինել ընկերներ, լավ հարևաններ, և Վիշապն ու Փիղը պետք է միավորվեն...», - ասել է Սին Մոդիի հետ հանդիպման ժամանակ:

«Մենք նաև պետք է կատարենք մեր պատմական պարտավորությունները՝ պահպանելու բազմակողմանիությունը, բազմաբևեռ աշխարհը և միջազգային ինստիտուտներում ավելի մեծ ժողովրդավարություն, և միասին աշխատենք Ասիայում և ամբողջ աշխարհում խաղաղության ու բարգավաճման համար», - հավելել է Չինաստանի ղեկավարը:

Մոդին հայտարարել է, որ Հնդկաստանը հավատարիմ է Չինաստանի հետ իր կապերի զարգացմանը՝ հիմնված փոխադարձ վստահության, հարգանքի և զգայունության վրա: Նրա խոսքով՝ 2,8 միլիարդ մարդկանց բարեկեցությունը կապված է Հնդկաստանի և Չինաստանի միջև երկկողմ համագործակցության հետ:

Մոդին նաև հայտարարել է Չինաստանի հետ ուղիղ ավիահաղորդակցության վերսկսման մասին: Նա հավելել է, որ «խաղաղության և կայունության» մթնոլորտ է հաստատվել Հիմալայներում Չինաստանի հետ սահմանին, որտեղ 2020 թվականին տեղի է ունեցել ռազմական առճակատում, որը սառեցրել էր Հնդկաստանի և Չինաստանի միջև համագործակցության գրեթե բոլոր ոլորտները: