Վրաստանը քննադատել է Եվրամիությանը «անլուրջ վերաբերմունքի» համար

Պաշտոնական Թբիլիսին խիստ քննադատության է ենթարկել Եվրամիությանը՝ Լյուքսեմբուրգում հոկտեմբերի 20-ին կայանալիք կապի հարցերով նախարարական հանդիպմանը Վրաստանին միայն դեսպանի մակարդակով հրավիրելու համար։ Վրաստանի արտաքին գործերի նախարարությունում այս քայլը որակել են որպես «անլուրջ վերաբերմունք» ԵՄ ինստիտուտների կողմից՝ նշելով, որ նման մոտեցումն անտեսում է ինչպես աշխարհաքաղաքական, այնպես էլ աշխարհագրական իրողությունները։

Գերատեսչությունից ընդգծել են, որ հանդիպմանը հրավիրվել են Կենտրոնական Ասիայի և Արևելյան գործընկերության երկրների՝ Հայաստանի, Ադրբեջանի, Թուրքիայի, Թուրքմենստանի, Ուզբեկստանի, Տաջիկստանի, Ղազախստանի և Ղրղզստանի արտաքին գործերի նախարարները։ Վրաստանի ԱԳՆ-ն անընդունելի է համարում իր երկրին դեսպանի մակարդակով հրավեր ուղարկելը և նշում, որ նման որոշման հիմնավորումները մնում են անհասկանալի։

Նշվում է, որ Վրաստանը նախապես տեղեկացրել էր Եվրոպական արտաքին քաղաքական գործունեության ծառայությանն իր դիրքորոշման մասին։ ԱԳՆ-ում ընդգծել են, որ կապի և տարածաշրջանային անվտանգության վերաբերյալ կարևոր քննարկումներին հանրապետության մասնակցությունը պետք է տեղի ունենա համապատասխան մակարդակով և բխի ԵՄ անդամ երկրների շահերից։

Գերատեսչությունում նաև նշել են, որ դեսպանի մակարդակով հրավերը կարող է դիտարկվել որպես Վրաստանի մասնակցության հարցը քաղաքական շահարկումների մեջ օգտագործելու և արմատական օրակարգի ու ներքին բևեռացմանը նպաստելու փորձ։ ԱԳՆ-ն հույս է հայտնել, որ ԵՄ անդամ երկրների մեծամասնությունը գիտակցում է Վրաստանի դերը Եվրոպայի և Ասիայի միջև կապի հարցերում և չի սատարում նման մոտեցմանը։