«Սադախլո» անցակետում ՀՀ քաղաքացի է ձերբակալվել խոշոր չափի թմրանյութով

Վրաստանի Ներքին գործերի նախարարության քրեական ոստիկանության և Եկամուտների ծառայության մաքսային դեպարտամենտի աշխատակիցները «Սադախլո» անցակետում ձերբակալել են ՀՀ քաղաքացու՝ 1984 թվականին ծնված տղամարդու։ Նա մեղադրվում է առանձնապես խոշոր չափերով թմրանյութերի ապօրինի ներկրման և պահման մեջ։

Իրավապահները խուզարկություն են իրականացրել ձերբակալվածի ավտոմեքենայում, որի արդյունքում հայտնաբերվել և առգրավվել է շուրջ 1 կիլոգրամ «Կլեֆեդրոն» տեսակի թմրանյութ։

Փաստի առթիվ հետաքննությունը տարվում է Վրաստանի Քրեական օրենսգրքի 260-րդ և 262-րդ հոդվածներով, որոնք սահմանում են պատիժ թմրանյութերի ապօրինի շրջանառության համար։

Մեղադրյալին սպառնում է մինչև 20 տարվա կամ ցմահ ազատազրկում։