Ադրբեջանն ու Վրաստանը Բաքվում քննարկել են ԱԹՍ-ների կիրառման փորձը

Ադրբեջանի և Վրաստանի միջև 2025 թվականի համար կնքված երկկողմ ռազմական համագործակցության ծրագրի շրջանկում, Վրաստանի ՊՆ պատվիրակությունը աշխատանքային այցով այցելել է Բաքու։ Այցի գլխավոր նպատակն էր փորձի փոխանակումն անօդաչու թռչող սարքերի (ԱԹՍ) օգտագործման ոլորտում։ Այս մասին հայտնում է Ադրբեջանի ՊՆ մամուլի ծառայությունը։

Այցի շրջանակներում կազմակերպված հանդիպման ընթացքում վրացի հյուրերին մանրամասն զեկույց է ներկայացվել ադրբեջանական բանակում անօդաչու թռչող սարքերի օգտագործման, մարտական գործողություններում դրանց կիրառման առանձնահատկությունների, ինչպես նաև մարտական թռիչքների կազմակերպման և ԱԹՍ-ների կիրառման ոլորտի զարգացման վերաբերյալ։

Ադրբեջանական կողմը կիսվել է իր փորձով՝ ներկայացնելով այն մարտավարական և տեխնիկական լուծումները, որոնք կիրառվում են իրենց զինված ուժերում։

Զեկույցի ավարտին կողմերը հարցուպատասխանի ձևաչափով քննարկել են փոխադարձ հետաքրքրություն ներկայացնող մի շարք հարցեր։