Ոչ մի ուսանող ֆինանսական խնդիրների պատճառով դուրս չի մնա բուհից. նախարար

Ուսանողների միջազգային օրվա առթիվ ՀՀ Կրթության, գիտության, մշակույթի և սպորտի նախարար Ժաննա Անդրեասյանը շնորհավորական ուղերձ է հղել ուսանողությանը՝ կարևորելով նրանց դերը պետության զարգացման գործում և ներկայացնելով ոլորտում իրականացվող առանցքային բարեփոխումները։

Նախարարն իր խոսքում ընդգծել է, որ համալսարաններն ու ուսանողները պատմականորեն հանդիսացել են քաղաքակրթությունների զարգացման շարժիչ ուժը։ Այս համատեքստում կենսական անհրաժեշտություն է դիտարկվում բարձրագույն կրթության համակարգի արդիականացումը՝ մրցունակ կրթություն ապահովելու ներկա և ապագա սերունդների համար։ Ուղերձում առանձնահատուկ ուշադրություն է դարձվել ուսանողների ֆինանսական աջակցությանը։ Նախատեսվում է կրթաթոշակների բազմամակարդակ համակարգ, որը թույլ կտա իրականացնել թիրախային ծրագրեր տարբեր խմբերի համար։

«ՀՀ կառավարությունն առաջնորդվում է այն հանձնառությամբ, որ պատշաճ առաջադիմություն ունեցող ոչ մի ուսանող ֆինանսական խնդիրների պատճառով չդադարի սովորել կամ դուրս չմնա կրթական համակարգից», - նշել է Ժաննա Անդրեասյանը։

Բացի օրենսդրական փոփոխություններից, կարևորվում է կրթություն-տնտեսություն կապի ամրապնդումը։ Այս նպատակով նախատեսվում է կարգավորել համալսարանական ինկուբատորների ստեղծման ոլորտը, ինչը ուսանողներին հնարավորություն կտա հանդիպել գործատուներին և ձևավորել իրենց ապագա գործունեությունը։

Հեռանկարային ծրագրերից է «Ակադեմիական քաղաքի» նախագիծը, որը կառավարությունը հետևողականորեն առաջ է մղում։ Այն նպատակ ունի ստեղծել համաշխարհային մակարդակի կրթական ու գիտական կենտրոն՝ բարձրագույն կրթությունը մրցունակ դարձնելով ոչ միայն հայաստանյան, այլև միջազգային ուսանողների համար։