Ուզբեկստանի ԱԳՆ-ն Ռուսաստանից պահանջել է պատժել տաքսու վարորդին վիրավորողին

Ուզբեկստանի արտգործնախարարությունը Ռուսաստանի արտգործնախարարությանը պաշտոնական նոտա է ուղարկել՝ պահանջելով պարզել տեսանյութում պատկերված տղամարդու ինքնությունը, որը վիրավորում է ուզբեկստանցի տաքսու վարորդին, և միջոցներ ձեռնարկել գործող օրենսդրությանը համապատասխան։ Այս մասին հայտնել է երկրի ԱԳՆ մամուլի խոսնակ Ախրոր Բուրխանովը։

«Մասնավորապես, օգոստոսին լայն հանրային արձագանք առաջացրած գործով հետաքննություն է անցկացվում։ Այդ կապակցությամբ Ռուսաստանի ԱԳՆ-ին պաշտոնական նոտա է ուղարկվել՝ տեսանյութում պատկերված անձի ինքնությունը պարզելու և օրենքի շրջանակներում միջոցներ ձեռնարկելու նպատակով», - նշել է մամուլի խոսնակը։

Նա հավելել է, որ Ուզբեկստանի քաղաքացիները գտնվում են պետության պաշտպանության ներքո՝ անկախ նրանց գտնվելու վայրից։

Հրապարակված տեսանյութում տղամարդը բղավում է տաքսու վարորդի վրա՝ ուղեկցելով իր խոսքերը հայհոյանքներով և վիրավորանքներով.

«Դու ստրուկ ես, ռուսների ստրուկ։ Ուզբեկստանում ոչինչ չգտար, եկար մեզ մոտ։ Դու քո տանը չես, եկել ես աշխատելու՝ աշխատիր»։