ԱՄՆ փոխնախագահի ավտոշարասյունը վնասվել է արկի բեկորներից

ԱՄՆ փոխնախագահ Ջեյ Դի Վենսի ավտոշարասյան մեքենաներից մեկը վնասվել է Կալիֆորնիայում ծովային հետևակի կորպուսի 250-ամյակին նվիրված միջոցառման ժամանակ վաղաժամ պայթած հրետանային արկի բեկորներից։ Միջադեպի հետևանքով զոհեր չկան։

Ինչպես հայտնում են լրատվամիջոցները, շաբաթ օրը Քեմփ Փենդլթոն ռազմաբազայում ցուցադրական կրակոցների ժամանակ 155 միլիմետրանոց արկը վաղաժամ է պայթել՝ թափվելով մոտակայքում գտնվող միջպետական մայրուղու վրա։ Բեկորները վնասել են փոխնախագահի անվտանգությունն ապահովող մոտոցիկլետը և Կալիֆորնիայի ճանապարհային պարեկային ծառայության մեքենան։

Կալիֆորնիայի ճանապարհային պարեկային ծառայության պետ Թոնի Կորոնադոն իրավիճակը որակել է «արտառոց և մտահոգիչ»՝ նշելով, որ գործող մայրուղու վրա մարտական կրակով կամ պայթուցիկներով վարժանքներ չափազանց հազվադեպ են անցկացվում։

Միջադեպից հետո ծովային հետևակի կորպուսը դադարեցրել է կրակոցները և հետաքննություն սկսել՝ պարզելու պատահարի բուն պատճառը։ Ծովային հետևակի առաջին էքսպեդիցիոն ուժերի հայտարարության մեջ նշվում է, որ ցուցադրությունը անցել է անվտանգության խիստ գնահատում և ունեցել է պաշտպանության մի քանի շերտ՝ քաղաքացիների անվտանգությունն ապահովելու համար։

Կալիֆորնիայի նահանգապետ Գևին Նյուսոմը, որը դեռ անցած շաբաթ մտահոգություն էր հայտնել մայրուղու վրա մարտական հրթիռներով վարժանքներ անցկացնելու վերաբերյալ, քննադատել է նախագահ Դոնալդ Թրամփին և փոխնախագահ Վենսին՝ նրանց մեղադրելով «ցուցադրություն կազմակերպելու համար մարդկանց կյանքը վտանգի տակ դնելու» մեջ։

Փոխնախագահ Վենսը, կիրակի օրը լրագրողների հետ զրույցում, մեկնաբանելով միջադեպը, նշել է, որ «հիանալի այց» է ունեցել ծովային հետևակայինների մոտ։ «Նրանք ակնհայտորեն ոգևորված էին, և ես նույնպես շատ ոգևորված էի», - ասել է նա Վաշինգտոն վերադառնալիս։