Ժնևում ԱՄՆ-ն ու Ուկրաինան մշակել են խաղաղության նոր փաստաթուղթ

Ժնևում ավարտվել են ԱՄՆ-ի և Ուկրաինայի միջև բարձր մակարդակի բանակցությունները, որոնց առանցքում ամերիկյան կողմի առաջարկած խաղաղության ծրագիրն էր։ Համատեղ հայտարարության համաձայն՝ կողմերը զգալի առաջընթաց են գրանցել դիրքորոշումների համաձայնեցման հարցում և մշակել են խաղաղության «թարմացված ու կատարելագործված շրջանակային փաստաթուղթ»։

2025 թվականի նոյեմբերի 23-ին Ժնևում կայացած հանդիպումը, ինչպես նշվում է համատեղ հայտարարության մեջ, անցել է կառուցողական, կենտրոնացված և հարգալից մթնոլորտում։ Երկու կողմերն էլ խորհրդակցությունները գնահատել են «չափազանց արդյունավետ»՝ ընդգծելով արդար և կայուն խաղաղության հասնելու իրենց ընդհանուր հանձնառությունը։

«Մենք այստեղ ժամանել ենք մեկ նպատակով՝ նվազեցնելու չլուծված կետերի քանակը։ Այդ նպատակին զգալիորեն հասանք», - բանակցությունների արդյունքներն այսպես է մեկնաբանել ԱՄՆ պետքարտուղար Մարկո Ռուբիոն։ Նա հավելել է, որ փաստաթուղթը վերջնական տեսքի բերելու համար դեռ աշխատանք կա, և այն պետք է հաստատվի երկու երկրների նախագահների կողմից։

Բանակցությունների արդյունքում կողմերը մշակել են խաղաղության թարմացված և կատարելագործված շրջանակային փաստաթուղթ։ Ըստ New York Times-ի՝ Դոնալդ Թրամփի վարչակազմի առաջարկած 28 կետից բաղկացած սկզբնական պլանը բանակցությունների ընթացքում փոփոխությունների է ենթարկվել, և ներկայիս աշխատանքային տարբերակը տարբերվում է համացանցում ավելի վաղ հրապարակված տարբերակից։ Թե կոնկրետ ինչ փոփոխություններ են կատարվել, առայժմ չի մանրամասնվում։

Բանակցությունների ընթացքում կողմերը վերահաստատել են, որ ցանկացած ապագա համաձայնագիր պետք է լիովին հարգի Ուկրաինայի ինքնիշխանությունը և ապահովի կայուն ու արդար խաղաղություն։ Ուկրաինական պատվիրակությունն իր երախտագիտությունն է հայտնել Միացյալ Նահանգներին և անձամբ նախագահ Դոնալդ Թրամփին՝ պատերազմի և մարդկային կորուստների դադարեցմանն ուղղված հաստատակամ նվիրվածության համար։

Առաջիկա օրերին ԱՄՆ-ն ու Ուկրաինան կշարունակեն ինտենսիվ աշխատանքը համատեղ առաջարկների շուրջ։ Նախատեսվում է նաև սերտ կապ պահպանել եվրոպացի գործընկերների հետ՝ գործընթացի առաջընթացին զուգընթաց։ Վերջնական որոշումները կկայացվեն Ուկրաինայի և Միացյալ Նահանգների նախագահների կողմից։ Կողմերը վերահաստատել են իրենց պատրաստակամությունը՝ համատեղ աշխատելու Ուկրաինայի անվտանգությունը, կայունությունն ու վերականգնումն ապահովող խաղաղության հասնելու ուղղությամբ։