ԱՄՆ-ն պատժամիջոցներ է սահմանել ռուսական էներգետիկ հսկաների դեմ

Միացյալ Նահանգները նոր, խիստ պատժամիջոցներ է սահմանել ռուսական էներգետիկ հսկաների՝ «Ռոսնեֆթ» և «Լուկօյլ» ընկերությունների դեմ՝ նպատակ ունենալով ուժեղացնել ճնշումը Մոսկվայի վրա։ ԱՄՆ ֆինանսների նախարարությունը պաշտոնապես հայտարարել է, որ այս քայլը պայմանավորված է Ուկրաինայում պատերազմի դադարեցմանն ուղղված խաղաղ գործընթացին Ռուսաստանի «լուրջ հանձնառության բացակայությամբ»։

ԱՄՆ ֆինանսների նախարարության հայտարարության մեջ նշվում է, որ գերատեսչությունը պատրաստ է անհրաժեշտության դեպքում լրացուցիչ միջոցներ ձեռնարկել՝ «աջակցելու նախագահ Թրամփի ջանքերին՝ հակամարտությունը դադարեցնելու համար»։

Պատժամիջոցների ցանկը բավականին ընդգրկուն է։ Դրանք տարածվում են ոչ միայն մայր ընկերությունների, այլև նրանց դուստր ձեռնարկությունների վրա, մասնավորապես՝ «Ռոսնեֆթի» 28 և «Լուկօյլի» 6 կառույցների։ Ավելին, ԱՄՆ ֆինանսների նախարարությունը պարզաբանել է, որ սահմանափակումները վերաբերում են ցանկացած կառույցի, որտեղ «Ռոսնեֆթը» կամ «Լուկօյլը» ունեն ավելի քան 50% բաժնեմաս, նույնիսկ եթե այդ կառույցները ուղղակիորեն նշված չեն պատժամիջոցային ցուցակում։

Վաշինգտոնը մեկամսյա ժամկետ է սահմանել պատժամիջոցների տակ հայտնված ընկերությունների հետ գործառնությունները դադարեցնելու համար։ Օտարերկրյա ակտիվների վերահսկման գրասենյակը հատուկ լիցենզիա է տրամադրել, որը թույլ է տալիս մինչև նոյեմբերի 21-ը ավարտին հասցնել բոլոր գործարքները։ Այդ նույն ժամկետում անհրաժեշտ է նաև դուրս գալ երկու ընկերությունների արժեթղթերից։ Առանձին լիցենզիա է տրվել Ռուսաստանի սահմաններից դուրս գտնվող «Լուկօյլի» լցակայանների հետ գործունեությունը դադարեցնելու համար։

Սակայն, պատժամիջոցներն ունեն որոշակի բացառություններ։ Ինչպես և մեկ շաբաթ առաջ նմանատիպ սահմանափակումներ կիրառած Մեծ Բրիտանիան, ԱՄՆ-ն ևս պատժամիջոցների գործողությունից դուրս է թողել Ադրբեջանում և Ղազախստանում իրականացվող միջազգային կարևոր նախագծերը՝ «Կասպյան խողովակաշարային կոնսորցիումը» (КТК) և «ԹենգիզՇեվրոյլը»։ Այս նախագծերում «Ռոսնեֆթի» և «Լուկօյլի» մասնակցությամբ գործարքները թույլատրված են անժամկետ գործողության առանձին լիցենզիայով։