ԱՄՆ-ն և Իսրայելը շատ մոտ են Թրամփի պլանի շուրջ համաձայնությանը․ Axios

Axios պարբերական, վկայակոչելով Սպիտակ տան բարձրաստիճան ներկայացուցիչների, գրում է, որ Միացյալ Նահանգները և Իսրայելը «շատ մոտ են» Գազայի հատվածում պատերազմի դադարեցման վերաբերյալ նախագահ Դոնալդ Թրամփի վարչակազմի առաջարկած պլանի շուրջ համաձայնությանը։

Նման գնահատականները հնչել են Նյու Յորքում Թրամփի փեսայի՝ Ջարեդ Քուշների և նախագահի հատուկ բանագնաց Ուիթքոֆի հետ Իսրայելի վարչապետ Բենիամին Նեթանյահուի հանդիպումից հետո։ Հաղորդվում է, որ պատերազմի ավարտի այս պլանի հեղինակները հենց Քուշներն ու Ուիթքոֆն են։ Այն բաղկացած է 21 կետից։

Միևնույն ժամանակ, ամերիկացի պաշտոնյաները շեշտում են, որ ցանկացած վերջնական գործարքի համար անհրաժեշտ է ՀԱՄԱՍ-ի համաձայնությունը, որը, սակայն, պաշտոնապես դեռ ձեռք բերված չէ։

Ակնկալվում է, որ սեպտեմբերի 29-ին Սպիտակ տանը տեղի կունենա նախագահ Թրամփի և վարչապետ Նեթանյահուի հանդիպումը։ Քննարկումների կենտրոնում կլինի հենց այս ծրագիրը, և հավանական է, որ այն կարժանանա կողմերի հավանությանը։ Այս հանդիպումը կարող է վճռորոշ դառնալ համաձայնությունը վերջնական տեսքի բերելու համար՝ նախքան այն ՀԱՄԱՍ-ին ներկայացնելը։