ԱՄՆ-ը և ԵՄ-ն կնքել են առևտրային համաձայնագիր․ Reuters

ԱՄՆ-ը և Եվրոպական միությունը պաշտոնապես կնքել են առևտրային շրջանակային համաձայնագիր, որը նախատեսում է 15% մաքսատուրք ԱՄՆ-ի կողմից եվրոպական ապրանքների մեծ մասի, այդ թվում՝ ավտոմեքենաների, դեղագործական արտադրանքի, կիսահաղորդիչների և փայտանյութի համար:

Ի պատասխան՝ ԵՄ-ն խոստացել է հանել մաքսատուրքերը ամերիկյան ամբողջ արդյունաբերական արտադրանքից և ապահովել արտոնյալ մուտք ամերիկյան ծովամթերքի և գյուղատնտեսական ապրանքների որոշ տեսակների համար:

ԱՄՆ վարչակազմի պաշտոնյայի տվյալներով՝ ավտոմեքենաների և դրանց պահեստամասերի մաքսատուրքերը կարող են նվազեցվել առաջիկա մի քանի շաբաթվա ընթացքում, այն բանից հետո, երբ Բրյուսելը ներկայացնի համապատասխան օրենսդրական փոփոխությունները:

Կողմերը նաև մտադիր են ընդլայնել համաձայնագիրը, բարելավել շուկաներ մուտքի հնարավորությունները և համագործակցել էներգետիկայի, տեխնոլոգիաների և պողպատի ու ալյումինի մատակարարումների կայունության ապահովման հարցերում: