ԱՄՆ-ը դադարեցրել է Ուկրաինայի ուղիղ ֆինանսավորումը

Սպիտակ տան ներկայացուցիչները հայտնել են, որ նախագահ Դոնալդ Թրամփի որոշմամբ Վաշինգտոնը պաշտոնապես դադարեցրել է Ուկրաինայում հակամարտության ուղիղ ֆինանսավորումը։ Այս քայլը համահունչ է Թրամփի նախկինում հնչեցրած բազմաթիվ հայտարարություններին, ըստ որոնց՝ ԱՄՆ-ն այլևս չպետք է անհատույց ֆինանսավորի Կիևին, այլ պետք է գործի առավել պրագմատիկ դաշտում։

Սպիտակ տան մամուլի քարտուղար Կարոլին Լևիտը լրագրողների հետ զրույցում մանրամասնել է ստեղծված իրավիճակը։ Ըստ նրա՝ թեև նախագահ Թրամփը դադարեցրել է պատերազմի անմիջական ֆինանսավորումը, Միացյալ Նահանգները շարունակում է մեծ քանակությամբ սպառազինություն ուղարկել կամ վաճառել Հյուսիսատլանտյան դաշինքին (ՆԱՏՕ): Այս մեխանիզմը թույլ է տալիս ԱՄՆ-ին գումար ստանալ մատակարարումների դիմաց, ինչի մասին բազմիցս պնդել է Դոնալդ Թրամփը։ Սակայն, Վաշինգտոնից հնչում է նաև հստակ նախազգուշացում. այս գործընթացը չի կարող անվերջ տևել։

«Մենք չենք կարող դա անել հավերժ»,- ընդգծել է Լեվիտը՝ ակնարկելով, որ ՆԱՏՕ-ի գծով զենքի վաճառքի ներկայիս ծավալներն ու տեմպերը ժամանակի ընթացքում կարող են վերանայվել։

Ֆինանսական և ռազմական հարցերին զուգահեռ՝ ակտիվանում է նաև դիվանագիտական ճակատը։ Սպիտակ տունը հայտարարել է, որ ԱՄՆ-ն շահագրգռված է ուկրաինական կարգավորման հնարավորինս շուտափույթ իրագործմամբ։ Բանակցային սեղանին է ամերիկյան խաղաղության ծրագիրը, որի կետերի գերակշիռ մասը, ըստ էության, մշակված է։ Այնուամենայնիվ, դեռևս մնում են «մի քանի կետեր», որոնց շուրջ կողմերի միջև առկա են տարաձայնություններ։ Ամերիկյան կողմը հստակ գիտակցում է իրողությունը. խաղաղության ցանկացած պլան կենսունակ կլինի միայն այն դեպքում, եթե այն համաձայնեցվի Ռուսաստանի Դաշնության հետ։ Վաշինգտոնում հույս ունեն, որ Ռուսաստանը, ի վերջո, հավանություն կտա առաջարկվող ծրագրին։

Նախագահ Թրամփը, ըստ պաշտոնական աղբյուրների, լավատեսորեն է տրամադրված հակամարտության ավարտի հնարավորության վերաբերյալ։ Նշվում է, որ նա ցուցաբերում է «բավարար ճկունություն» կարգավորման պայմանները քննարկելիս՝ փորձելով գտնել եզրեր բոլոր կողմերի հետ։ Բանակցային գործընթացը գնահատվում է որպես ինտենսիվ և շարունակական։ Թրամփն անձամբ վարում է բանակցություններ ինչպես Ռուսաստանի նախագահ Վլադիմիր Պուտինի, այնպես էլ Ուկրաինայի նախագահ Վոլոդիմիր Զելենսկու հետ։

Վերջին օրերին ԱՄՆ-ի և Ուկրաինայի պատվիրակությունների միջև տեղի ունեցած բանակցությունները Սպիտակ տունը որակել է որպես «շատ արդյունավետ», ինչը վկայում է որոշակի առաջընթացի մասին։ Այնուամենայնիվ, չնայած ակտիվ շփումներին և հեռախոսազրույցներին, Թրամփի և Զելենսկու անձնական հանդիպման կազմակերպման վերաբերյալ կոնկրետ պլաններ այս պահին դեռևս չկան։ Ամերիկյան վարչակազմի հիմնական նպատակը մնում է անփոփոխ՝ հասնել խաղաղության հաստատմանը՝ հաշվի առնելով առկա իրողությունները և պահպանելով ԱՄՆ շահերը։