ԱՄՆ B-1B ռմբակոծիչները թռիչք են իրականացրել Վենեսուելայի մոտ

Ամերիկայի Միացյալ Նահանգների ռազմաօդային ուժերի մի քանի B-1B Lancer տիպի ռազմավարական ռմբակոծիչներ թռիչք են իրականացրել Վենեսուելայի մերձակայքում։ Ըստ տեղական լրատվամիջոցների, սա ամերիկյան կողմի ուժի երրորդ ցուցադրությունն է այս ամսվա ընթացքում։

Ինչպես նշում է Air & Space Forces ամսագիրը, առաքելությունն իրականացվել է «թմրակարտելների» և Նիկոլաս Մադուրոյի կառավարության դեմ արշավի շրջանակում, որին Վաշինգտոնը լեգիտիմ չի ճանաչում։ Ռմբակոծիչներն օդ են բարձրացել Հյուսիսային Դակոտայում գտնվող Գրանդ Ֆորքս ավիաբազայից, և նրանց տեղաշարժը տեսանելի է եղել թռիչքների մոնիթորինգի բաց հարթակներում, ինչը վկայում է, որ գործողությունը չի թաքցվել։

Այս զորաշարժերին զուգահեռ՝ ԱՄՆ-ն ուժեղացնում է իր ռազմական ներկայությունը տարածաշրջանում։ Վերջերս «Ջերալդ Ռ. Ֆորդ» ավիակիրը և «USS Gravely» ականակիրը ուղարկվել են Լատինական Ամերիկա։ Բացի այդ, Պուերտո Ռիկոյի ավիաբազաներից թռիչքներ են իրականացնում հարվածային ուղղաթիռներ և MQ-9 Reaper տիպի անօդաչու թռչող սարքեր։

Հարկ է նշել, որ ավելի վաղ լրատվամիջոցներում տեղեկություններ էին տարածվել Վենեսուելայի սահման B-1 ռմբակոծիչներ ուղարկվելու մասին, սակայն ԱՄՆ նախագահ Դոնալդ Թրամփը հայտարարել էր, որ այդ լուրերը չեն համապատասխանում իրականությանը։