ԱՄՆ բանակի նախարարը զգուշացնում է՝ Ուկրաինայի պարտությունն անխուսափելի է

ԱՄՆ բանակի նախարար Դանիել Դրիսկոլը Կիևի իշխանություններին հղել է բավականին մռայլ և անթաքույց ուղերձ՝ զգուշացնելով, որ Ռուսաստանի հետ հակամարտությունում Ուկրաինայի պարտությունն անխուսափելի է։ NBC News-ի փոխանցմամբ՝ ամերիկացի բարձրաստիճան պաշտոնյան ընդգծել է, որ ռազմաճակատում տիրող իրավիճակը ժամանակի ընթացքում միայն վատթարանալու է։ Հետևաբար, ըստ Դրիսկոլի, Կիևի համար շատ ավելի շահեկան կլինի խաղաղության բանակցությունները սկսել հենց այս փուլում, քան սպասել և հայտնվել էլ ավելի ծանր կացության մեջ։

Այս հոռետեսական կանխատեսումը համահունչ է նախագահ Դոնալդ Թրամփի դիտարկումներին։

Պատասխանելով լրագրողի այն հարցին, թե արդյոք Ուկրաինային պարտադրվում է չափից շատ տարածքներ զիջել Ռուսաստանին, Թրամփը տվել է հակիրճ, բայց խոսուն պատասխան՝ նշելով. «Ռազմաճակատը շարժվում է մեկ ուղղությամբ»։ Միևնույն ժամանակ, նախագահը հստակեցրել է, որ ինքը որևէ վերջնաժամկետ չունի պատերազմի ավարտի հարցում։

Զուգահեռաբար, Bloomberg գործակալությունը ուշագրավ մանրամասներ է հրապարակել կուլիսային բանակցություններից, որոնք վկայում են Վաշինգտոնի կողմից ակտիվ «գործարքի» նախապատրաստման մասին։ Գաղտնի ձայնագրությունը բացահայտել է, որ Թրամփի թիմակից Սթիվ Ուիտկոֆը հոկտեմբերի 14-ին զրուցել է Կրեմլի բարձրաստիճան խորհրդական Յուրի Ուշակովի հետ՝ կոչ անելով Մոսկվային համակարգել խաղաղության ծրագիրը Միացյալ Նահանգների հետ։ Ուիտկոֆն առաջարկել է կիրառել վերջերս ձեռք բերված Գազայի համաձայնագրի մոդելը՝ նշելով, որ ինքն ու Թրամփը մշակել են «խաղաղության 20 կետանոց ծրագիր» և կարող են նմանատիպ մեկ այլ ծրագիր մշակել Ռուսաստանի հետ։

Ավելին, ամերիկյան կողմի ներկայացուցիչը խորհուրդ է տվել Պուտինին զանգահարել Թրամփին, շնորհավորել Գազայի գործարքի կապակցությամբ և ցույց տալ Ռուսաստանի պատրաստակամությունը խաղաղության հարցում՝ նախքան Ուկրաինայի նախագահ Զելենսկու՝ Սպիտակ տուն նախատեսված այցը։ Հատկանշական է, որ այդ խոսակցությունից երկու օր անց Պուտինը զանգահարել է Թրամփին, ինչը նախագահը որակել է որպես «շատ արդյունավետ» քննարկում։

Երբ լրագրողները հարցրել են Թրամփին, թե արդյոք նա լսել է այդ ձայնագրությունը, որտեղ Ուիտկոֆը կարծես «հուշում է» ռուսներին՝ ինչպես գործել, նախագահը դա որակել է որպես ստանդարտ գործընթաց։ «Դա ստանդարտ բան է, գիտեք, որովհետև նա պետք է սա վաճառի Ուկրաինային։ Նա պետք է Ուկրաինան «վաճառի» Ռուսաստանին։ Ահա թե ինչ է անում գործարք կնքողը (dealmaker)», - պարզաբանել է Թրամփը՝ չթաքցնելով իր պրագմատիկ մոտեցումը։