ՄԱԿ-ը որոշել է դուրս բերել խաղաղապահներին Լիբանանից

ՄԱԿ-ի Անվտանգության խորհուրդը որոշել է աստիճանաբար դադարեցնել Լիբանանի հարավում գործող ժամանակավոր խաղաղապահ ուժերի գործունեությունը մինչև 2026 թ․ դեկտեմբերի 31-ը։ Որոշումն ընդունվել է Միացյալ Նահանգների և Իսրայելի ճնշմամբ։

Մանդատը կգործի 16 ամիս՝ ներառելով ուժերի և սարքավորումների դուրսբերումը: Խաղաղապահ ուժերը ձեւավորվել էին 1978-ին՝ վերահսկելու իսրայելական զորքերի դուրսբերումը, իսկ 2006-ից հետո՝ նրանց մանդատն ընդլայնվել էր՝ ներառելով հաշտեցման մեխանիզմ Իսրայելի ու «Հեզբոլլահ»-ի միջև։

Լիբանանը կողմ է երկարաձգմանը՝ ընդգծելով, որ իր բանակը բավարար միջոցներ չունի։ Իսրայելը մեղադրել է խաղաղապահներին՝ իրենց պատասխանատվության գոտում «Հեզբոլլահ»-ի ռազմական ամրապնդումը անտեսելու մեջ։ ԱՄՆ-ը և դաշնակիցները մտադիր են լիարժեք վերահսկողություն փոխանցել Լիբանանի զորքերին։