Ուկրաինական բանակը Ղրիմում հարվածել է ռուսական գնացքի

Ուկրաինայի Հատուկ գործողությունների ուժերը օգոստոսի 21-ի գիշերը հարվածել են ռուսական վառելիքաքսուկային նյութերով բեռնված գնացքին՝ Ղրիմի Ջանկոյ երկաթուղային կայարանի մոտակայքում:

«Ուկրաինայի Զինված ուժերի Հատուկ գործողությունների ուժերը հատուկ գործողություն են իրականացրել Ջանկոյ երկաթուղային կայարանի մոտակայքում: Գործողությունը տեղի է ունեցել օգոստոսի 21-ի գիշերը: Հատուկջոկատայինները հարվածել են ռուսական գնացքին», - ասվում է օգոստոսի 21-ին Հատուկ գործողությունների ուժերի Telegram ալիքում տարածված հաղորդագրության մեջ:

Տեղեկությունների համաձայն՝ հատուկ գործողությունների արդյունքում խոչընդոտվել է ռուսական զորքերի հարավային խմբավորման մատակարարումը:

Ինչպես ավելի վաղ հայտնվել էր, օգոստոսի 12-ին Հատուկ գործողությունների ուժերը ոչնչացրել են «Սկալա-Մ» ռադիոտեղորոշիչ համալիրը՝ Ղրիմի Աբրիկոսովկա բնակավայրում:

Նշվում է, որ «Սկալա-Մ»-ը խորհրդա-ռուսական ռադիոտեղորոշիչ համալիր է, որը ներառում է օդային թիրախների հայտնաբերման առաջնային և երկրորդային հնարավորություններ և նախատեսված է օդային տարածքի վերահսկման համար: Ռադարի գործողության շառավիղը կազմում է շուրջ 350 կմ: