Ուկրաինայում Զելենսկու դեմ ցույցերը շարունակվում են

Ուկրաինայում չեն դադարում Զելենսկու ստորագրած վիճահարույց օրինագծի դեմ զանգվածային ցույցերը: Այդ փոփոխություններով Ուկրաինան հակակոռուպցիոն արևմտյան չափանիշներին մոտեցնելու բարեփոխումների շրջանակում ստեղծված գերատեսչությունները ենթարկվելու են գլխավոր դատախազին:

Ակցիաներ են ընթանում Կիևում և Ուկրաինայի մի շարք այլ քաղաքներում: Հուլիսի 23-ին մի քանի հազար մարդ հավաքվել է Կիևում՝ Իվան Ֆրանկոյի հրապարակում, Ուկրաինայի նախագահի գրասենյակի շենքից ոչ հեռու: Նրանք պահանջում են միջամտությունից և ճնշումներից պաշտպանել Ուկրաինայի՝ կոռուպցիայի դեմ պայքարի մարմինները։

Այս օրենքի ընդունման համար Կիևին քննադատել են նաև Եվրոպացի դաշնակիցները:

Ուկրաինայի Ազգային հակակոռուպցիոն բյուրոյի և Կոռուպցիայի դեմ պայքարի մասնագիտացված դատախազության ներկայացուցիչների համար Զելենսկիի հետ հանդիպումը համոզիչ չի եղել. քննարկումից հետո այդ գործակալությունները կոչ են արել վերականգնել իրենց անկախությունը: