Ուկրաինան ներկայացրել է իր «կարմիր գծերը» ՄԱԿ-ում

Ուկրաինական հողը չի վաճառվում, ինքնիշխանությունը քննարկման ենթակա չէ, իսկ խաղաղությունը հնարավոր է միայն «ոչինչ Ուկրաինայի մասին՝ առանց Ուկրաինայի» սկզբունքով։ Այսպիսի հայտարարությամբ ՄԱԿ-ի Անվտանգության խորհրդի նիստում հանդես է եկել կազմակերպությունում Ուկրաինայի մշտական ներկայացուցչի տեղակալ Քրիստինա Գայովիշինը։

Նա նշել է, որ Կիևը պատրաստ է կառուցողական աշխատանքի «խաղաղության ծրագրի» շուրջ, սակայն հստակ սահմանել է այն հիմնական «կարմիր գծերը», որոնք անբանակցելի են ուկրաինական կողմի համար։

Ուկրաինայի անունից ներկայացված սկզբունքային դիրքորոշումները հետևյալն են.

• Ուկրաինան համաձայն չէ իր Զինված ուժերի թվաքանակի կրճատմանը։

• Կիևը դեմ է ՆԱՏՕ-ին կամ որևէ այլ դաշինքի անդամակցելու արգելքին։

• Ուկրաինան չի ճանաչի Ռուսաստանի կողմից զբաղեցված ուկրաինական տարածքները որպես ռուսական։

• Կիևը կհրաժարվի գնալ զիջումների, որոնք «խարխլում են ուկրաինական ինքնությունը», ներառյալ՝ լեզվի հարցում։

Բացի այս հիմնարար կետերից, ուկրաինացի դիվանագետը նշել է նաև բանակցային գործընթացի մեկնարկի հստակ նախապայման։ Նրա խոսքով՝ ցանկացած բովանդակային քննարկում կարող է սկսվել միայն այն բանից հետո, երբ ճակատի գծում ամբողջությամբ կդադարեցվի կրակը։