Մոսկվան Ուկրաինան չստացավ, բայց կորցնում է այլ տարածքներ․ Bloomberg

Լայնամասշտաբ պատերազմն Ուկրաինայում զգալիորեն խարխլում է Մոսկվայի իշխանությունն իր նախկին կայսրության տարածքում։ Bloomberg-ի վերլուծության համաձայն՝ այնպիսի երկրներ, ինչպիսիք են Ղազախստանը, Հայաստանը և Ադրբեջանը, որոնք նախկինում գտնվում էին Ռուսաստանի ուղեծրում, այժմ ստիպված են վերանայել իրենց անվտանգության քաղաքականությունը և փնտրել նոր դաշնակիցներ։

Պատճառն այն է, որ Պուտինը հստակ ցույց տվեց իր պատրաստակամությունը՝ ուժ կիրառելու նախկին կայսերական տարածքները վերադարձնելու կամ արտասահմանում ապրող ռուսներին «պաշտպանելու» համար։ Եվ մինչ Կրեմլում պաշտոնյաներն անհանգստացած են Մոսկվայի դիրքերի թուլացմամբ, ասպարեզ են դուրս գալիս այլ խոշոր տերություններ, որոնք ակտիվորեն լրացնում են առաջացած դատարկությունը։

Չինաստանն ուժեղացնում է իր տնտեսական կապերը։ Վերջին երկու տարվա ընթացքում Կենտրոնական Ասիայի հինգ հանրապետությունների հետ Չինաստանի առևտրաշրջանառությունն աճել է մեկ երրորդով։ Պեկինն արդեն շրջանցել է Ռուսաստանին՝ դառնալով Ղազախստանի և Ուզբեկստանի խոշորագույն առևտրային գործընկերը։ Նախատեսվում է Ղազախստանի հետ երրորդ երկաթուղային գծի կառուցում, իսկ Սի Ծինփինի այցի ընթացքում կնքվել են 24 միլիարդ դոլարի պայմանագրեր։

Միացյալ Նահանգները նույնպես ակտիվացել է։ Խաղաղության համաձայնագրից հետո ԱՄՆ նախագահը Հայաստանի և Ադրբեջանի ղեկավարներին հրավիրել է Սպիտակ տուն։ Վաշինգտոնը բացառիկ իրավունքներ է ստացել այսպես կոչված «Թրամփի երթուղի՝ հանուն միջազգային խաղաղության և բարգավաճման» նախագծի զարգացման համար, որը Հայաստանի տարածքով Ադրբեջանը կկապի իր Նախիջևանի էքսկլավի հետ։

Թուրքիան նույնպես հնարավորություն է տեսնում տարածաշրջանում սահմանների բացման և տրանսպորտային կապերի զարգացման մեջ։

Միևնույն ժամանակ, Եվրամիությունը ռազմավարական գործընկերության համաձայնագիր է ստորագրել Կենտրոնական Ասիայի հինգ երկրների հետ՝ ներառյալ մինչև 12 միլիարդ եվրոյի ներդրումային ծրագիր՝ տրանսպորտային կապերի և էներգետիկայի զարգացման համար։

Անշուշտ, Ռուսաստանը կարող է փորձել վերականգնել իր ազդեցությունն այս երկրներում Ուկրաինայում պատերազմի ավարտից հետո՝ ազատելով իր ռազմական ռեսուրսները։ Սակայն այժմ նա ունի ուժեղ մրցակիցներ, որոնք արդեն ամրապնդել են իրենց դիրքերը տարածաշրջանում, գրում է Bloomberg-ը։