Ուկրաինական դրոններն ընդդեմ ռուսական նավթի

Ուկրաինան, թիրախավորելով Ռուսաստանի նավթագազային արդյունաբերության օբյեկտները, հասցրել է շուրջ 100 միլիարդ դոլարի տնտեսական վնաս՝ որդեգրելով մի ռազմավարություն, որի նպատակն է խաթարել Կրեմլի ռազմական մեքենան և հակամարտության իրականությունը հասցնել շարքային ռուսաստանցիներին։ Այս մասին, The Sun-ի հաղորդմամբ, հայտարարել է ռազմական փորձագետ Ֆիլիպ Ինգրեմը։ Ինգրեմի գնահատմամբ՝ Ուկրաինայի կողմից իրականացվող այս հարձակումները «հանճարեղ քայլ» են, որոնք, թեև ռիսկային են, սակայն ուղղված են Ռուսաստանի ապակայունացմանը և, ի վերջո, «Պուտինի ռազմական մեքենայի գլխատմանը»։

Փորձագետը ընդգծում է, որ այս մարտավարությունը նպատակ ունի փոխել ռուս հասարակության ընկալումը պատերազմի վերաբերյալ։

Նրա կարծիքով՝ ռուսական նավթի դեմ այս պատերազմը սպառնում է առաջացնել վառելիքի սուր պակաս, ինչն իր հերթին «հսկայական ճնշում» կստեղծի Մոսկվայի՝ մարտական գործողությունները շարունակելու կարողության վրա։ Ռուսաստանի տնտեսության առանցքային ճյուղի թիրախավորումը ոչ միայն հարվածում է Կրեմլի ֆինանսական հոսքերին, որոնք անհրաժեշտ են պատերազմը վարելու համար, այլև ստեղծում է ներքին լոգիստիկ և սոցիալական խնդիրներ։ Ռուսաստանն արդեն իսկ սահմանափակումներ ունի բենզինի արտահանման հարցում, ինչը ցույց է տալիս, որ առնվազն որոշակի մասով՝ ռուսական տնտեսությանը հարվածելու Կիևի մարտավարությունը արդյունքներ տալիս է։