Թուրքիայում 17 մրցավար է ձերբակալվել՝ պայմանավորված խաղերի գործով

Թուրքիայի ֆուտբոլային աշխարհը ցնցել է աննախադեպ կոռուպցիոն սկանդալը, որի կենտրոնում հայտնվել են ֆուտբոլային մրցավարները։ Խաղերի վրա կատարվող խաղադրույքների գործով իրականացված լայնածավալ հետաքննության շրջանակում ձերբակալվել է 21 մարդ, որոնցից 17-ը՝ գործող մրցավարներ։

Ինչպես հայտնել են Ստամբուլի դատախազությունից, իրավապահ մարմինների գործողությունները տեղի են ունեցել երկրի 12 շրջանում, այդ թվում՝ Ստամբուլում։ Ձերբակալվածների թվում են ոչ միայն մրցավարներ, այլև ֆուտբոլային ակումբների բարձրաստիճան ներկայացուցիչներ։ Մասնավորապես, կալանավորվել են «Էյուփսփոր» ակումբի նախագահ Մուրատ Օզքայան և «Քասըմփաշա» ակումբի նախկին սեփականատեր Ֆաթիհ Սարաչը։

Հետաքննչական գործողությունների ընթացքում պարզվել է, որ կասկածյալ մրցավարներից երկուսը գտնվում են արտասահմանում, ևս մեկին չի հաջողվել հայտնաբերել իր բնակության վայրում։ Նրանց նկատմամբ ևս իրականացվում են համապատասխան միջոցառումներ։

Այս լայնածավալ հետաքննության մեկնարկի համար հիմք է հանդիսացել Թուրքիայի ֆուտբոլի ֆեդերացիայի (TFF) նախագահ Իբրահիմ Հաջիօսմանօղլուի հնչեցրած սկանդալային բացահայտումը։ Հոկտեմբերի 27-ին կայացած մամուլի ասուլիսի ժամանակ ֆեդերացիայի ղեկավարը ներկայացրել էր ցնցող տվյալներ, որոնք բացահայտել են համակարգային խնդրի մասշտաբները։

Ըստ Հաջիօսմանօղլուի՝ պրոֆեսիոնալ լիգաներում աշխատող 571 մրցավարներից 371-ը, այսինքն՝ գրեթե երկու երրորդը, հաշիվներ ունի բուքմեյքերական գրասենյակներում։ Ավելին, նրանցից 152-ը ակտիվորեն խաղադրույքներ են կատարում։ Այս թվերը, փաստացի, վկայում են շահերի լրջագույն բախման և ֆուտբոլային հանդիպումների արդյունքների վրա ապօրինի ազդեցության հսկայական ռիսկերի մասին։ Փաստորեն, յուրաքանչյուր չորրորդ մրցավարը պարբերաբար մասնակցում է տոտալիզատորի խաղերին, ինչն անթույլատրելի է սպորտի այս տեսակի համար։

Այս սկանդալը լուրջ ստվեր է գցում թուրքական ֆուտբոլի հեղինակության վրա։ Հետաքննությունը շարունակվում է, և սպասվում է, որ այն կարող է բացահայտել կոռուպցիոն ցանցի նորանոր օղակներ՝ ավելի խորացնելով ճգնաժամը, որում հայտնվել է թուրքական ֆուտբոլը։