Թուրքիայի ԱԽ-ն քննարկել է հայ-ադրբեջանական գործընթացը

Թուրքիայի ազգային անվտանգության խորհուրդը երկրի ղեկավար Ռեջեփ Էրդողանի նախագահությամբ նոյեմբերի 26-ին նիստ է անցկացրել, որի ընթացքում, ի թիվս այլ հարցերի, քննարկվել է Հարավային Կովկասում խաղաղության գործընթացը։ Այդ մասին հայտնել է Թուրքիայի նախագահի աշխատակազմի հաղորդակցության վարչությունը։

Մանրամասնվում է, որ խոսքը վերաբերում է նաև, մասնավորապես, հայ-ադրբեջանական հաշտեցման գործընթացին։

«Ադրբեջանի և Հայաստանի միջև խաղաղության գործընթացում վերջին դրական զարգացումների լույսի ներքո քննարկվել են երկկողմ և տարածաշրջանային համագործակցության հնարավորությունները։ Վերահաստատվել է թուրքական կողմի հանձնառությունը Հարավային Կովկասում խաղաղություն, կայունություն հաստատելու և զարգացում ապահովելու հարցում»,- ասված է հաղորդագրության մեջ։

Հիշեցնենք, որ ավելի վաղ Թուրքիայի արտգործնախարարն էր հայտարարություն արել՝ Հայաստան-Թուրքիա հարաբերությունների կարգավորումն անմիջականորեն պայմանավորելով Հայաստան-Ադրբեջան հարաբերությունների կարգավորման հետ։ Այդ հայտարարությանը հակադարձել էին երևանից՝ հորդորելով գործընթացները չկապել միմյանց հետ։