Թուրքիան պատրաստ է Հայաստանի հետ եռակողմ հանդիպման. տրանսպորտի նախարար

Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն՝ APA գործակալության թուրքական բյուրոյին տված մեկնաբանությունում ասել է, որ եթե Ադրբեջանը համաձայնություն տա, ապա հնարավոր կլինի կազմակերպել Թուրքիայի, Ադրբեջանի և Հայաստանի տրանսպորտի նախարարների եռակողմ հանդիպում։

«Մենք հաճախ ենք հանդիպում Ադրբեջանի թվային զարգացման և տրանսպորտի նախարար Ռաշադ Նաբիևի հետ։ Մի քանի հանդիպում էլ ունեցել ենք Հայաստանի տրանսպորտի նախարարի հետ։ Եռակողմ հանդիպումը հնարավոր է միայն Ադրբեջանի համաձայնության դեպքում։ Եթե այն տրվի, մենք լիովին պատրաստ ենք, քանի որ Ադրբեջանի դիրքորոշումը մեզ համար մեծ նշանակություն ունի», — նշել է Ուրալօղլուն։

Նախարարը հավելել է, որ այսպես կոչված «Զանգեզուրի միջանցքի» բացման նախապատրաստական աշխատանքներն ընթանում են բարձր մակարդակով, և Ադրբեջանի հետ իրականացվել է «բավականին համակարգված աշխատանք»։

«Մենք նախապես պլանավորել ենք այն ամենը, ինչ անհրաժեշտ կլինի անել խաղաղ գործընթացի լիարժեք ավարտից հետո։ Անհրաժեշտ բոլոր պատրաստությունները կատարված են»,- ասել է թուրք նախարարը։