Թուրքիան կոչ է անում ամրապնդել դաշինքն Ադրբեջանի և Պակիստանի հետ

Թուրքիայի խորհրդարանի խոսնակ Նուման Քուրթուլմուշը կոչ է արել Թուրքիայի, Ադրբեջանի և Պակիստանի միջև եռակողմ համագործակցության մեխանիզմը դարձնել ավելի կայուն և ինստիտուցիոնալ հարթակ։ Այս մասին նա հայտարարել է երեք երկրների խորհրդարանների խոսնակների եռակողմ հանդիպման ժամանակ։

«Մենք պետք է մեր եռակողմ մեխանիզմը հասցնենք ավելի կայուն և ինստիտուցիոնալ մակարդակի։ Հաշվի առնելով այն մարտահրավերները, որոնց վերջին շրջանում բախվում են մեր երկրները ինչպես տարածաշրջանային, այնպես էլ միջազգային մակարդակում, ես համոզված եմ, որ մեր խորհրդարանների համար անխուսափելի է սերտ համագործակցությունը և ջանքերի համակարգումը»,-հայտարարել է Քուրթուլմուշը։

Ըստ նրա՝ տարածաշրջանային անվտանգության համար լուրջ վտանգ են ներկայացնում Աֆղանստանից բխող ահաբեկչության, անօրինական միգրացիայի և թմրամիջոցների շրջանառության սպառնալիքները։ Թուրք խոսնակն ընդգծել է, որ դրանց կանխարգելման համար անհրաժեշտ է խորացնել համագործակցությունը ռազմական, պաշտպանական և ռազմարդյունաբերական ոլորտներում։

Անդրադառնալով Հարավային Կովկասի իրավիճակին՝ Քուրթուլմուշը նշել է, որ Ադրբեջանի և Հայաստանի միջև խաղաղ բանակցություններում առաջընթացը նոր հնարավորություններ է բացում, այսպես ասած, «Զանգեզուրի միջանցքի» ամրապնդման և «Միջին միջանցքի» զարգացման համար։ Այս համատեքստում նա առանձնացրել է Իրաքի «Զարգացման ուղի» նախագիծը Թուրքիայի միջոցով «Միջին միջանցքին» ինտեգրելու նախաձեռնությունը, ինչը, նրա խոսքով, թույլ կտա ավելի սերտ տնտեսական ինտեգրում հաստատել Պակիստանից մինչև Եվրոպա։

Թուրքիայի խորհրդարանի ղեկավարը իր ելույթում նաև շեշտել է Սիրիայում կայունացմանն աջակցելու կարևորությունը և Պաղեստինյան պետության ստեղծմանն ուղղված միջազգային ջանքերը շարունակելու անհրաժեշտությունը։ Այս ամենի հաշվարկով, եռակողմ ձևաչափը դիտարկվում է ոչ միայն որպես քաղաքական դաշինք, այլև որպես ռազմավարական նախագիծ՝ ուղղված անվտանգության, տնտեսության և լոգիստիկայի ոլորտներում համատեղ նպատակների իրականացմանը։