Թուրքիան բացում է իր աշխատաշուկան թյուրքական պետությունների համար

Թուրքիայի նախագահ Ռեջեփ Էրդողանը ստորագրել է հրամանագիր, որը արմատապես փոխում է թյուրքական ծագում ունեցող օտարերկրացիների իրավական կարգավիճակը երկրում։ Այս քայլը դիտարկվում է որպես թյուրքական աշխարհի ինտեգրմանն ուղղված ևս մեկ նշանակալի քայլ՝ այս անգամ աշխատաշուկայի ոլորտում։

Նոր հրամանագրի համաձայն՝ Ադրբեջանի, Թուրքմենստանի, Ղազախստանի, Ղրղզստանի և Ուզբեկստանի քաղաքացիները այսուհետ կկարողանան ազատորեն զբաղվել իրենց մասնագիտություններով և արհեստներով Թուրքիայի տարածքում։ Այս որոշումը զգալիորեն պարզեցնում է աշխատանքի թույլտվություն ստանալու բարդ ընթացակարգերը՝ վերացնելով բազմաթիվ բյուրոկրատական քաշքշուկներ։

Այսպիսով, թյուրքական պետությունների ներկայացուցիչները հնարավորություն կստանան աշխատելու ինչպես պետական հիմնարկներում, այնպես էլ մասնավոր ընկերություններում՝ շատ ավելի բարենպաստ պայմաններով։ Սակայն հրամանագրի ամենահեղափոխական կետն այն է, որ այս երկրների քաղաքացիները Թուրքիայում այլևս չեն դիտարկվի որպես «օտարերկրացիներ»՝ աշխատանքային իրավունքների տեսանկյունից։ Սա նշանակում է, որ նրանք կկարողանան մասնակցել երկրի սոցիալ-տնտեսական կյանքին՝ Թուրքիայի քաղաքացիների հետ գրեթե հավասար իրավունքներով։

Փորձագետները գնահատում են այս քայլը որպես կարևոր ներդրում Թյուրքական պետությունների կազմակերպության (ԹՊԿ) անդամ երկրների միջև համագործակցության ամրապնդման և աշխատաշուկաների ինտեգրման գործում։ Այն ոչ միայն կնպաստի որակյալ մասնագետների ազատ տեղաշարժին, այլև կխորացնի տնտեսական և մշակութային կապերը ԹՊԿ շրջանակներում՝ իրականություն դարձնելով «մեկ ազգ, բազմաթիվ պետություններ» գաղափարը նաև տնտեսական հարթությունում։ Ակնկալվում է, որ այս որոշումը կխթանի նաև Թուրքիայի տնտեսությունը՝ ներգրավելով նոր մասնագետների տարբեր ոլորտներից։