Թուրքիան 2000 զինվոր է պատրաստում Գազայի համար

11 ՆՈՅ 2025 10:16

Թուրքիան ակտիվորեն նախապատրաստում է շուրջ 2000 զինծառայողից բաղկացած բրիգադ՝ Գազայի հատվածում ստեղծվելիք կայունացման միջազգային ուժերի կազմում տեղակայելու համար։ Այս քայլն իրականացվում է՝ հակառակ Իսրայելի կտրուկ դիմադրությանը, որը հայտարարել է, թե թուրք զինվորի ոտքը Գազայում չի լինելու։

Նախատեսվում է, որ ստորաբաժանման կազմում կընդգրկվեն թուրքական բանակի՝ խաղաղապահ առաքելությունների փորձ ունեցող զինվորականներ։ Այս նախաձեռնությունը քննարկվում է ԱՄՆ-ի և այլ միջազգային գործընկերների հետ՝ որպես Գազայում հետպատերազմյան իրավիճակի կայունացման ծրագրի մաս։

Սակայն գործընթացը բախվում է մի շարք խոչընդոտների։ Սպիտակ տունը դեռևս վերջնական որոշում չի կայացրել այս հարցի վերաբերյալ։ Բացի այդ, դեռևս չի հաստատվել ՄԱԿ-ի Անվտանգության խորհրդի բանաձևը, որը պետք է կարգավորի միջազգային ուժերի մանդատը և, ի թիվս այլ հարցերի, նախատեսի ՀԱՄԱՍ-ի զինաթափումը։

Իրավիճակը բարդացնում են նաև տարածաշրջանային դերակատարների մտահոգությունները։ Թուրքիան և Եգիպտոսը զգուշանում են, որ իրենց զորքերի մասնակցությունը կարող է երկրներին ներքաշել ուղիղ հակամարտության մեջ։ Միևնույն ժամանակ, Իսրայելը չի ցանկանում իր սահմանների մոտ տեսնել ՆԱՏՕ-ի անդամ հզոր դաշնակցի զորքերի ներկայությունը Գազայում։

Փաստացի, հակառակ Անկարայի պատրաստակամությանը, թուրքական խաղաղապահների տեղակայման հեռանկարը մնում է անորոշ՝ կախված քաղաքական բարդ հավասարակշռությունից և միջազգային համաձայնության ձեռքբերումից։

Առաջարկվող հոդվածներ

Մուտք գործեք կամ ստեղծեք անվճար ReOpen Media հաշիվ՝ մեկնաբանություններ տեղադրելու համարԳրանցվել