Թուրքական MKE ռազմական ընկերությունը մասնաճյուղ է բացել Ադրբեջանում

Ադրբեջան-Թուրքիա ռազմարդյունաբերական համագործակցությունը շարունակում է խորանալ. Ադրբեջանի պետական հարկային ծառայությունը պաշտոնապես գրանցել է «Makine ve Kimya Azerbaijan» սահմանափակ պատասխանատվությամբ ընկերությունը։ Սա Թուրքիայի ռազմարդյունաբերական համալիրի առաջատար ձեռնարկություններից մեկի՝ «Makine ve Kimya Endüstrisi A.Ş.»-ի պաշտոնական դուստր կառույցն է Ադրբեջանում։

Նորաստեղծ ընկերության իրավաբանական հասցեն է Բաքու քաղաքի Սաբայիլի շրջանի Զարիֆա Ալիևայի փողոց 103-ը։ Ընկերության կանոնադրական կապիտալը կազմում է զգալի գումար՝ 1 միլիոն մանաթ։ Որպես օրինական ներկայացուցիչ նշանակվել է Թուրքիայի քաղաքացի Իլհամի Քելեշը, ով միաժամանակ հանդիսանում է մայր ընկերության՝ «Makine ve Kimya Endüstrisi A.Ş.»-ի վարչության նախագահի տեղակալը։

Այս քայլը վկայում է երկու երկրների միջև ռազմական արդյունաբերության ոլորտում կապերի ինստիտուցիոնալ մակարդակի բարձրացման մասին։

Դրա դրսևորումներն ավելի վաղ արտահայտվել էին անօդաչուների արտադրությնա ոլորտում խորը համագործակցությամբ։ Ադրբեջանում անգամ սկսել են թուրքական տեխնոլոգիաներով անօդաչուներ արտադրել։