Սիրիան ինքը պետք է որոշի Ռուսաստանի հետ հարաբերությունները․ Թուրքիայի ԱԳՆ

Թուրքիայի իշխանությունները կարծում են, որ Սիրիայի կառավարությունն ինքը պետք է որոշի, թե ինչպես կառուցել իր հարաբերությունները Ռուսաստանի հետ, այդ թվում՝ երկրում ռուսական ռազմական ներկայության հարցում։ Այս մասին «Коммерсантъ»-ին հայտնել են Թուրքիայի ԱԳՆ աղբյուրները՝ պատասխանելով Անկարայի դիրքորոշմանը վերաբերող հարցին։

Թուրք դիվանագետները շեշտել են, որ Անկարան կողմնակից է «Սիրիայի կառավարության և ցանկացած երրորդ երկրի միջև ինքնիշխան և իրավահավասար երկկողմ հարաբերություններին՝ հիմնված փոխադարձ հարգանքի և շահերի հաշվառման վրա»։ Նրանք հավելել են. «Սիրիայի կառավարությունն ինքն է որոշում, թե ինչպես մոտենալ Ռուսաստանի Դաշնության հետ երկկողմ հարաբերություններին և ինչպես դրանք կառուցել»։

ԱԳՆ-ից նաև հայտնել են, որ «Թուրքիան ակտիվ քաղաքականություն է վարում՝ զարգացնելու փոխգործակցությունը Սիրիայի կառավարության և միջազգային հանրության միջև՝ ապահովելու համար կայունության և անվտանգության հաստատմանն ուղղված ազգային ջանքերի մշտական աջակցությունը»։

Այս հայտարարությունը հաջորդել է Ռուսաստանի և Սիրիայի նախագահներ Վլադիմիր Պուտինի և Ահմեդ աշ-Շարաայի միջև կայացած բանակցություններին, որոնց ընթացքում, ըստ Կրեմլի խոսնակ Դմիտրի Պեսկովի, քննարկվել է Սիրիայում ռուսական ռազմաբազաների պահպանման հարցը։ Սակայն Կրեմլը կոնկրետ մանրամասներ չի հայտնել։

Հատկանշական է, որ դեռ գարնանը Սիրիայի անցումային շրջանի նախագահ Ահմեդ աշ-Շարաան հայտնել էր, որ սիրիական իշխանությունները Ռուսաստանի և Թուրքիայի հետ բանակցություններ են վարում ռազմական ներկայությանը վերաբերող նոր համաձայնագրերի շուրջ։ Օգոստոսի 13-ին Անկարան և Դամասկոսը արդեն իսկ կնքել են ռազմական համաձայնագիր, որը վերաբերում է սիրիական նոր բանակի զինծառայողների որակավորման բարձրացմանը և անցումային կառավարությանը ժամանակակից ռազմական տեխնիկայի փոխանցմանը։

Ավելի վաղ հայտնի էր դարձել, որ Դամասկոսը հետաքրքրություն է ցուցաբերել ռուսական ռազմական ոստիկանության կողմից Սիրիայի հարավային նահանգներում պարեկության վերսկսման հարցում, ինչպես դա եղել է մինչև 2024 թվականի դեկտեմբերի 8-ը՝ Բաշար Ասադի ռեժիմի անկումը։ Ըստ աղբյուրի՝ անցումային կառավարությունը կարծում է, որ նման քայլը կարող է սահմանափակել Իսրայելի ռազմական ակտիվությունը, որը 2024 թվականի դեկտեմբերից զբաղեցրել է Սիրիայի հարավային շրջանների զգալի մասը։