Թուրքիան դատապարտել է Նեթանյահուի հայտարարությունը Հայոց ցեղասպանության մասին

Իսրայելի վարչապետ Բենիամին Նեթանյահուի հայտարարությունը 1915 թվականի իրադարձությունների վերաբերյալ անցյալի ողբերգությունները քաղաքական նպատակներով շահագործելու փորձ է։ Այս մասին ասված է Թուրքիայի ԱԳՆ-ի տարածած հայտարարության մեջ։

«Նեթանյահուն, որը դատվում է պաղեստինցի ժողովրդի դեմ կատարված ցեղասպանության մեջ իր դերակատարման համար, փորձում է թաքցնել իր և իր կառավարության կողմից կատարված հանցագործությունները։ Մենք դատապարտում և մերժում ենք այս հայտարարությունը, որը անհամատեղելի է պատմական և իրավական փաստերի հետ»,- մասնավորապես ասված է Թուրքիայի ԱԳՆ հայտարարության մեջ:

Հիշեցնենք, որ Իսրայելի վարչապետ Բենիամին Նեթանյահուն օգոստոսի 26-ին առաջին անգամ հայտարարել է, որ ճանաչում է Օսմանյան կայսրության իրականացրած ցեղասպանությունը հայերի, ասորիների և հույների նկատմամբ 20-րդ դարի սկզբում:

Պոդքասթեր Պատրիկ Բեթ-Դևիդի հարցին, թե ինչու Իսրայելը չի ճանաչում Հայոց ցեղասպանությունը, Նեթանյահուն պատասխանել է․ «Կարծում եմ՝ ճանաչում ենք։ Կնեսեթն ընդունել է այդ մասին բանաձև», թեև դա երբեք օրենքի ուժ չի ստացել։ Հարցին, թե ինչու Իսրայելի ոչ մի վարչապետ մինչ այժմ չի ճանաչել ցեղասպանությունը, Նեթանյահուն պատասխանել է․ «Հենց նոր արեցի։ Ահա ձեզ»։