Ի՞նչ է առաջարկում ԱՄՆ Խաղաղության ծրագիրը Ուկրաինային, Ռուսաստանին և աշխարհին

ԱՄՆ-ը Ուկրաինային է ներկայացրել պատերազմի կարգավորման նոր, համապարփակ ծրագիր, որի մանրամասները, հրապարակվելով ուկրաինական լրատվամիջոցներում, միանշանակ չեն ընդունվել ինչպես Կիևում, այնպես էլ Եվրամիությունում։ Փաստաթուղթը, որը ներկայացվել է նախագահ Զելենսկուն, նախատեսում է տարածքային լուրջ զիջումներ, Ուկրաինայի չեզոքություն, սակայն միևնույն ժամանակ՝ անվտանգության ամերիկյան երաշխիքներ և տնտեսական վերականգնման խոշոր փաթեթ։ Հրապարակումը դեռ ոչ պաշտոնական է։

Ուկրաինական «Страна» հրատարակությունը հրապարակել է Թրամփի «խաղաղության ծրագրի» ամբողջական տեքստը, որը բաղկացած է 28 կետից։

Financial Times-ի տվյալներով՝ ԱՄՆ-ն ակնկալում է, որ նախագահ Զելենսկին համաձայնագիրը կստորագրի մինչև նոյեմբերի 27-ը, որից հետո այն կներկայացվի Ռուսաստանի Դաշնությանը՝ գործընթացը մինչև դեկտեմբերի սկիզբն ավարտելու նպատակով։

Միևնույն ժամանակ, Axios-ի փոխանցմամբ, Թրամփի վարչակազմը փորձել է հավաստիացնել Ուկրաինային և եվրոպացի դաշնակիցներին, որ հրապարակված ծրագիրը «փաստաթղթի աշխատանքային տարբերակ է», և իրենց դիրքորոշումները հաշվի կառնվեն։ Ամերիկացի պաշտոնյան նշել է, որ ծրագիրը «գաղափարների շրջանակ է», որը ներառում է ինչպես ուկրաինական, այնպես էլ ռուսական դիրքորոշումներ։ «Եթե մարդկանց դուր չեն գալիս ծրագրի որոշակի մասեր, թող մեզ տեղյակ պահեն, և մենք կփորձենք փոխզիջում գտնել»,- ասել է ամերիկյան վարչակազմի ներկայացուցիչը։

Ի պատասխան՝ Ուկրաինայի նախագահ Զելենսկին զգուշավոր դիրքորոշում է որդեգրել։ «Ամերիկյան կողմը տրամադրել է իր առաջարկները՝ պատերազմն ավարտելու ծրագրի կետերը, իրենց տեսլականը։ Մենք կտրուկ հայտարարություններ չենք անի և տրամադրված ենք հստակ, ազնիվ աշխատանքի՝ ԱՄՆ-ի և մեր ընկերների ու գործընկերների հետ Եվրոպայում և աշխարհում», - նշել է նա՝ հավելելով, որ շուտով կզրուցի նախագահ Թրամփի հետ։