Թրամփը կոշտացնում է քաղաքականությունը մի շարք ուղղություններով

ԱՄՆ նախագահ Դոնալդ Թրամփը մի շարք կոշտ հայտարարություններ է արել միջազգային քաղաքականության առանցքային մի քանի ուղղություններով՝ անդրադառնալով Վենեսուելայի, Չինաստանի, իսրայելա-պաղեստինյան հակամարտության և Հնդկաստանի հետ հարաբերություններին։ Անոնսավորել է՝ Վաշինգտոնը մտադիր է բոլոր ուղղություններում մեծացնել ռազմական, քաղաքական և տնտեսական ճնշումը։

Վենեսուելա․ Ցամաքային գործողությունների հնարավորություն

Վենեսուելական նարկոկարտելների դեմ պայքարի շրջանակում Դոնալդ Թրամփը չի բացառել ցամաքային գործողությունների հնարավորությունը։ Լրագրողի հարցին, թե արդյոք նա դիտարկում է նման քայլեր, Թրամփը պատասխանել է. «Դե, ես չեմ ուզում ձեզ հստակ ասել, բայց մենք, անշուշտ, դիտարկում ենք ցամաքում գործողությունների հնարավորությունը, քանի որ ծովն այժմ մեր շատ լավ վերահսկողության տակ է»։

Միևնույն ժամանակ, նա խուսափել է պատասխանել հարցին, թե արդյոք Կենտրոնական հետախուզական վարչությունն (ԿՀՎ) ունի Մադուրոյի վերացման լիազորություններ՝ նշելով, որ դա «անհեթեթ հարց կլիներ իր համար»։ Այնուամենայնիվ, ըստ նրա, Վենեսուելան «զգում է ճնշումը»։

Մերձավոր Արևելք․ «Կանաչ լույս» Իսրայելի համար

Դոնալդ Թրամփը հայտարարել է, որ Իսրայելի պաշտպանության բանակը (ՑԱԽԱԼ) կարող է վերադառնալ Գազայի փողոցներ, եթե պաղեստինյան ՀԱՄԱՍ շարժումը չկատարի ամերիկյան խաղաղության ծրագրի պայմանները։ «Իսրայելը կվերադառնա այդ փողոցներ, հենց որ ես խոսքս ասեմ»,– CNN-ին տված հեռախոսազրույցում ասել է նա։ «Եթե Իսրայելը կարողանա մտնել և նրանց ջախջախել, ապա դա կարվի»։ Թրամփը հավելել է, որ ներկայումս «ստիպված է զսպել» իսրայելական իշխանություններին։

Այս հայտարարությունից հետո Իսրայելի պաշտպանության նախարար Իսրայել Կացը հանձնարարել է ՑԱԽԱԼ-ին նախապատրաստել Գազայում ռազմական գործողությունների վերսկսման պլան։ Ըստ նախարարի՝ Թրամփի ծրագրով ՀԱՄԱՍ-ը պարտավոր է վերադարձնել բոլոր զոհված պատանդներին և վայր դնել զենքը։ Հակառակ դեպքում Իսրայելը կվերսկսի ռազմական գործողությունները՝ պատերազմի բոլոր նպատակներին հասնելու համար։

Չինաստան և Հնդկաստան․ Առևտրային պատերազմ և նավթային գործարքներ

Դոնալդ Թրամփը հաստատել է, որ ԱՄՆ-ն արդեն իսկ գտնվում է Չինաստանի հետ առևտրային պատերազմի մեջ։ «Մենք արդեն դրա մեջ ենք»,– պատասխանել է նա լրագրողի հարցին։ «Տեսեք, մենք 100-տոկոսանոց մաքսատուրքեր ունենք։ Եթե չլինեին մաքսատուրքերը, մենք պարզապես գոյություն չէինք ունենա։ Չինաստանը տարիներ շարունակ մաքսատուրքեր է կիրառել մեր դեմ, բայց մենք երբեք չենք ունեցել մեկին, որը հարկ կհամարեր նույն կերպ պատասխանել»։

Միաժամանակ, Թրամփը դիվանագիտական հաջողություն է արձանագրել Հնդկաստանի հետ հարաբերություններում։ Նրա խոսքով՝ Հնդկաստանի վարչապետ Նարենդրա Մոդին իրեն խոստացել է, որ երկիրը կդադարեցնի ռուսական նավթ գնել։ «Նա ինձ հավաստիացրեց, որ իրենք ռուսական նավթ չեն գնի։ Սա լուրջ քայլ է առաջ։ Հիմա ես պետք է համոզեմ Չինաստանին անել նույնը»,– նշել է Թրամփը՝ հավելելով, որ գործընթացը ժամանակ կպահանջի։ Նա նաև ջերմ խոսքեր է հղել Մոդիին՝ նրան անվանելով «հիանալի մարդ» և «ընկեր»։